29-июлдиз Дагъустандин Кьил Сергей Меликова республикадин призывдин комиссиядин ва Оперштабдин саналди тир заседание кьиле тухвана. Адан сергьятра аваз, алай йисан гатфарин призывдин нетижаяр кьуна.
РД-дин военный комиссар Абдурагьман Мурадханова хабар гайивал, цIи Дагъустандай уьлкведин Яракьлу къуватрин жергейра къуллугъиз 3730 кас рекье туна. Адан гафаралди, Дагъустанди 2025-йисан гатфарин призыв агалкьунар аваз, план тамамдиз ацIуруналди акьалтIарна.
Призывдин кампания кьиле физвай вахтунда Махачкъаладин, Каспийскдин, Хасавюртдин, Буйнакскдин, Дербентдин, Дагъустандин Огнидин, Хасавюрт, Новолак, Буйнакскдин, Хунзах, Къайтагъ, Дахадаеван, Дербент, Ахцегь, Рутул, Докъузпара, СтIал Сулейманан, Кьурагь, Тарумовка, Ногъай, Табасаран, Казбек, Гуьмбет, Лак, Къули, Мегьарамдхуьруьн, Сергокъала, Акуша ва Гуниб районрин военкоматри кIвалах хъсан дережада аваз тешкилнавай.
Сергей Меликова и жигьетдай гуьгъуьна амай муниципалитетрин военкоматрин кIвалахдал Украинада кьиле физвай махсус серенжемдин ветеранар, «Доблесть гор» программадин, «Память гор» тешкилатдин векилар желб авун теклифна. Дагъустандин кьилин фикирдалди, зулун призыв гатIундалди вилик муниципалитетрин кьилерни военкомар патал тухузвай чирвилеринни методикадин мярекатар тешкилунин къайдани дегишна кIанзава. С.Меликова гьисабзавайвал, сифте нубатда абур вилик квай кампаниядиз гьазур хьанвай гьалдиз къимет гун герек я.
Заседанидал республикадин Кьили гатфарин призыв кьиле физвай чIавуз хъсан нетижаяр хьайи муниципалитетрин администрацийрин векилриз сагърай лагьана ва инлай кьулухъни кIвалах гьа и къайдада давамарун герек тирди къейдна. ГьакIни ада мярекатдин иштиракчийрин фикир армиядин жергейра къуллугъдай яшарив агакьнавайбуруз и кардикай тек са кампания кьиле физвай чIавуз ваъ, амай вахтарани хабар гун важиблу тирдал фикир желбна.
Агьмед Магьмудов
