Гьуьрметдин орден гана
Дагъустандин Кьил Сергей Меликован Указдалди машгьур футболист Александр Макароваз Дагъустан Республикадин II дережадин Гьуьрметдин орден гана.
Александр Макаров Советрин девирдин ва Россиядин машгьур футболист я. Ам хейлин йисара Махачкъаладин «Динамо» командадик кваз къугъвана ва жуьреба-жуьре командайрин варариз 280-далай артух тупар яна.
Алай вахтунда Александр Макарова республикадин аялрин спортшколадин директор яз кIвалахзава, гьа са вахтунда Дагъустандин школьникрин арада кьиле физвай футболдин лигадин кураторни я. Къейдна кIанда, и турнир уьлкведа хъсанбурукай сад яз гьисабзава. Ана виш агъзурдалай виниз аялри иштиракзава.
С. Меликова, республикадин спорт вилик финик чIехи пай кутунвайбурукай рахадайла, са шумуд сеферда Александр Макарован лайихлувилер къейдна.
1:0 гьисабдалди
2025/2026-йисарин сезондин Россиядин преьмер-лигадин 1-турдин сергьятра аваз 19-июлдиз Москвада футболдай «Спартак» ва Махачкъаладин «Динамо» командайрин арада матч кьиле фена. Къугъун 1:0 гьисабдалди «Спартак»-дин хийирдиз акьалтIна.
Матчдин 38-декьикьада «Спартак» командадик кваз къугъвазвай бразилви Маркиньоса «Динамо»-дин варариз туп яна. Махачкъалавийриз жавабдин туп хъиядай мумкинвал хьанач.
«Динамо»-ди нубатдин матч «Оренбург» командадихъ галаз кьиле тухуда. Ам 27-июлдиз кьиле фида.
Агьмед Магьмудов
