Играми газет кIелзавайбур!
СтIал Сулейманан райондай тир Бремоврин хизандиз чи куьмек герек я. Абурун аял — 10 йис хьанвай Мансур — начагъ я.
Духтурри адаз «мышечная дистрофия Дюшенна» диагноз эцигнава. Асул гьисабдай и азарди бедендин жукIумар харапIзава. Сифтегьан лишанар аялдин тахминан 1 йис хьайила винел акъатзава. Медицинадин рекьяй вахтунда куьмек тавуртIа, и азардик начагъдавай, яшар 15 йисарив агакьайла, эсиллагь къекъвез, юзаз хъжедач.
Алай аямда медицина вилик фенва, са шумуд йис идалай вилик себеб тежезвай и азар магъулбзавай дарманар пайда хьанва. Мансураз герек дармандин тIвар «Элевидис» я. Анжах и дарман лап еке къиметдай маса гузва: 230 миллион манатдай.
Гьелбетда, Бремоврин хизандихъ ихьтин такьатар авач, гьавиляй абуру мумкинвал авай гьар са касдивай Мансур сагъар хъувунин карда куьмек тIалабзава.
Аялдин диде-бубадин телефондин нумраяр: 8989-886-71-31; 8989-888-41-25 (Ибрагьим ва Камила Бремовар).
Сбербанкдин картадин нумраяр:
2202206909416369; 2202205628020510.
Мансуран гьал акваз-акваз зайиф жезва. И йикъара аялдиз мукьвабуру самокат къачунвай. Мансуравай ам гьалзавай чIавуз бедендин пайгарвал (равновесие) хуьз хьанач, ам алукьна. Нетижада адан гъил хана, пелелни кьацI хьана, адал кьуд цвал ала.
Санлай беден, жукIумар зайиф тирвиляй Мансуравай бязи дуьшуьшра бедендин пайгарвал хуьз жезвач, адаз четин жезва. Са гафуналди, азарди вичикай хабар гузва.
Гьуьрметлу ватанэгьлияр! Ша чна санал Бремоврин хизандиз куьмекин. Къе чна са низ ятIани куьмекзава, пака чунни масадан куьмекдихъ муьгьтеж хьун мумкин я. Къуй садан аялни начагъ тахьурай. Куь садакьаярни Аллагьди кьабулрай. Амин!
И макъаладихъ галай шикилдин куьмекдалди, «SilicaAR» приложение кутуна, Мансуран диде Камила Бремовадин эвер гуниз килигиз жеда. ТIвар кьунвай приложение андроид телефонра — «Плеймаркетдин», айфонра «App Store»-дин куьмекдалди кардик кутаз жеда.
«Лезги газет»
