Дагъустан гзаф кьадар инсанрин къазанжияр «хъендик квай» регион яз гьисабнава. Идакай Россиядин зегьметдин ва яшайишдин рекьяй хуьнин министерстводи хабар гузва. ИкI, «хъендик квай» экономикадин жигьетдай вилик жергеда Москвадин ва Ростовдин областар, Краснодардин ва Красноярскдин краяр, Дагъустан, Крым ва Чувашия ава.
Санлай къачурла, уьлкведа 2023-йисуз чпин къазанжияр далдаламишзавай 9,6 миллион кас — зегьметдиз къабил вири агьалийрин 13,4 процент — авай. 2024-йисуз ихьтинбурун кьадар 6,5 миллиондиз барабар тир, хабар гузва ТАСС-ди.
Агъадихъ галай рекъемрин бинедани гьа и кар авайди яз гьисабзава: россиявийриз кIанзавай мажибрин кьадар уьлкведа абурун юкьван кьадардилай 3,4-4 сеферда гзаф я. Месела, Махачкъалада, агентстводи хабар гузвайвал, регионда юкьван мажиб официальнидаказ 50 агъзур манат яз, агьалийри вацра 213 агъзур манатдин мажиб кIан хьуникай лугьузва. Гьисабзавайвал, им «хъендик кваз» кIвалахзавайбурун кьадар гзаф хьунин нетижа я.
РикIел хкин, РФ-дин Гьукуматдин патав гвай Финансрин университетди россиявийри гуьзлемишзавай мажибриз талукь яз ахтармишунар тухвана. И жигьетдай виридалайни еке истемишунар агъадихъ галай вад шегьердин агьалийри авунва: Махачкъаладин — 213 агъзур манат, Хабаровскдин — 188 агъзур манат, Москвадин — 185 агъзур, Иркутскдин — 175 агъзур ва Санкт-Петербургдин — 166 агъзур манат. ХьанайтIа кIанзавай тир мажибдин юкьван кьадар 146 агъзур манат яз гьисабзава. Гьа са вахтунда 2025-йисан апрелдин вацра россиявийрин мажибрин юкьван кьадар 97 375 манатдиз барабар тир.
Пешекарри гьисабзавайвал, Махачкъалада гуьзлемишзавай мажибдин кьадар гьакъикъатдилай лап винизди я: гьакъикъи мажибар ина тахминан 50 агъзур манатдиз барабар я. Хабаровскда ва Иркутскда и кар ВПК-дин кIвалахдихъ, военный рекьяй икьрардалди СВО-да къуллугъунихъ ва бейкаррин кьадар тIимил хьунихъ галаз алакъалу я. Москвада ва Санкт-Петербургда инсанриз виниз тир мажибар кIан хьун и шегьерра яшайишдин харжияр винизбур хьунихъ галаз алакъалу яз гьисабзава.
Финансрин университетди кьиле тухвай ахтармишунра Россиядин 35 шегьердай тир 7000 касди иштиракна.
Чи мухбир
