Хизандин, кIанивилин ва вафалувилин юкъуз заз Эминхуьруьн администрациядин кьилин заместитель Къизилгуьл Мегьамедовади ва хуьруьн библиотекадин заведующий Алла Буржалиевади зенг авуна, чеб и сувар тебрик ийиз хуьре-кIвале гьуьрмет авай Мадинат ва Шайда Сакаржаеврин кIвализ физвайдакай хабар гана ва зазни атун теклифна. За и теклиф шадвилелди кьабулна.

Сакаржаеврин хизанди мугьманар хушвилелди кьабулна. Къизилгуьл Мегьамедовади ва Алла Буржалиевади тебрикдин келимаяр лагьана ва Мадинат Къазибеговнадизни Шайда Халидовичаз савкьатар, цуьквер багъишна.

Хъсандиз дуьзмишнавай гьаятда ци­пицI­рин тегьенгар акъуднавай чардахдин кIаник эцигнавай столдихъ ацукьна, чна Мадинат ва Шайда Сакаржаеврихъ галаз уьмуьр­дин ва зегьметдин рекьерикай, хизандикай ихтилатар авуна.

Шайда 1952-йисан 19-майдиз Кьасумхуьрелай рагъакIидай патахъ 15 километрдин яргъа авай Хутаргърин хуьре дидедиз хьана. Ада хуьре кардик квай шко­ла-интернатда 9-классдал кьван кIел­на, 1970-йисуз Кьасумхуьрел 10-класс акьал­тIарна. Кьве йисуз Советрин Армиядин жергейра къуллугъна.

1973-йисуз Шайдади гьа и хуьряй тир Мадинатахъ галаз, сирер сад авуна, хизан кутуна.

— Гьа йисара чи хуьрерай гзаф жегьилар Къазахстандин Узень шегьердиз фин адетдиз элкъвенвай, — ихтилатзава Ш. Сакаржаева. — Мехъерар авур са тIимил вахтундилай чи жегьил хизанни гьаниз фена.

Шайда Халидовича гъурбатда «Мангэс»­ трестда устIарвиле, цехдин начальниквиле кIвалахна, Гурьев шегьердин нянин политехнический техникумни акьалтIарна.

1979-йисуз Эминхуьре (гьа вахтунда — Аламише) уьзуьмчивилин «Аламишинский»­ совхоз тешкилна. Шайда хуьруьз хтана, ам совхозда прорабвиле эцигна. Майишатда адан регьбервилик кваз хейлин дараматар хкажна.

Кьуд-вад йисуз Тюмендин областдин Сургут­ шегьерда газдинни нафтIадин мяденра кIва­лах авур Ш. Сакаржаева гуьгъуьнлай мад «Аламишинский» совхозда прорабвилин везифаяр давамар хъувуна. Хуьруьн куьчейриз газдин линияр тухудайлани, ада и кIвалахриз регьбервал гана.

Вичин чирвилерин дережа хкажунин мураддалди Шайда Сакаржаева Дагъустандин политехнический институтни заочнидаказ куьтягьна.

Гуьгъуьнлай Шайда Халидовича «Аламишинский» совхозда гараждин заведующийвиле, хуьруьн гамарни халичаяр храдай фабрикадин складчивиле, 8 йисуз хуьруьн Советдин председателдин заместителвиле намуслудаказ кIвалахна. Ада Советда кIвалахзавай йисара хуьруьн гзаф куьчейра къир цана, къван туна.

2011-йисалай лайихлу пенсияда авай Ш. Сакаржаев Эминхуьруьн агъсакъалрин советдин член, жегьилрин насигьатчи, хуьре баркаллу крарик кьил кутазвай касни я.

— Шайда Халидовича чи библиотекада тухузвай саки вири мярекатра активнидаказ иштиракзава, — лугьузва библиотекадин ­заведующий Алла Буржалиевади. — Ада Хутаргърин хуьруьн тарихдикай, анай акъа­тай машгьур ксарикай, дяведин ишти­ракчийрикай, лезги халкьдин виликан адет­рикай ийиз­вай ихтилатар гьар садаз итижлу я.

Шайда Халидовичан уьмуьрдин юлдаш Мадинат 1955-йисуз Хутаргърин хуьре лежберар-колхозчияр тир Къазибег ва Ширинат Сефербеговрин хизанда дидедиз хьана. Ада ругуд аял авай, марифатлу, гьуьр­метлу чIехи хизанда тербия къачуна, юкьван школа акьалтIарна.

Мадинат Къазибеговнади сифтедай Узень шегьерда, гуьгъуьнлай саки 30 йисуз «Аламишинский» совхозда гьакъисагъвилелди зегьмет чIугуна.

— КIвалах авай, зегьметдин нетижайри шадвал кутадай, гъилиз гьакъини къвезвай вахтар тир, — лугьузва М. Сакаржаевади. — Совхоздихъ 400 гектардилай виниз уьзуьмлухар авай. Анрин гьар са гектардай 100-110 центнер ципицIар кIватI хъийизвай. За кIвалах авур бригада ципицIар, салан майваяр, техил гьасилунал машгъул жезвай. Тапшуругъар артухни алаз тамамарзавай.

Мадинат гамарни халичаяр храдай ус­тадни я. Гьеле школада кIелзавай йисарилай эгечIна, ада цIудралди гьар жуьредин чешнейрин гамарни халичаяр храна, хуьруьн гзаф рушариз и сеняткарвал чирна. Абурукай са шумуда гуьгъуьнлай хуьруьн гамарин фабрикада кIвалахни авунай.

Шайда Халидовичани Мадинат Къази­беговнади 6 аял — 3 гадани 3 руш — уьмуьр­дин шегьредал акъудна. 1988-йисан 23- июн­диз СССР-дин Верховный Советдин Президиумдин Указдалди Мадинат Къазибеговнадиз «Дидевилин медаль» («Медаль материнства») гана.

Шайда ва Мадинат Сакаржаеврихъ 18 хтул ва 7 птул ава.

Веледрикай чIехи гада Халид — отставкада авай полициядин подполковник, амай веледарни гьарма сад са пешедин иесияр я. Виридахъ чпин кIвал-югъ, хизанар хьанва.

Хтулар тир Сакаржаев Сакаржа (гададин хва) ва Шагьламазов Рагьим (рушан хва) военный махсус серенжемдин иштиракчияр я. Сакаржадихъ «Жуьрэтлувиляй» орден ава.

Куь хизанда гьуьрмет, кIанивал, вафалувал, бахт ва берекат мадни артух хьурай, гьуьрметлу Мадинат Къазибеговна ва Шайда Халидович!

Хазран Кьасумов