Балугъ-къван

Шикилдай аквазвайди балугъ-къван (адаз гьакIни бородавчатка лугьузва) асул гьисабдай Секин ва Индиядин океанра яшамиш жезва. Яру гьуьлуьн къерехда (Египетда) авай Хургада, Шарм-эш-Шейх ва Дахаб курортра сиягьатчийрал, ял язавайбурал балугъ-къван гьалтун мумкин я.

И вагьши балугъдин кьетIенвал ам я хьи, адан далудал зегьер квай цацар ала, гьавиляй ам дуьньяда виридалайни зегьерлу балугъ яз гьисабзава. Адан яргъивилел вини кьил 40 сантиметр жеда. Адан ранг тIехв-тIехв хьайи, къацувални рагъулвал какахьай жуьрединди я. Адан рикI алай ем кIезрияр, креветкаяр ва пахлаханрин жуьреяр я. Це абур асул гьисабдай легъер, къванер авай чкайра яшамиш жеда. Маса балугърилай тафаватлу яз, балугъ-къван са артух гьерекатдик жедач, тIимил юзада. Къванерин арайра, лиледа ва я къумада акIана, и балугъри чпин йикъар акъудда.

Ада цацарай ахъайдай зегьерди (токсин) инсан фалуж жедай чкадал гъида. Са тIимил хъел акатайтIа, бородавчаткайри гьасятда далудал алай хци ва мягькем цацар хкажда. Абур акьван хци я хьи, гьатта инсандин чекмедай адан кIвачиз акьахда. Пешекарри тестикьарзавайвал, балугъди-къванци ягъай «раб» деринриз фейитIа, инсан патал адакай еке хаталувал ава. Эгер цаз инсандин ивидин еке дамардик акатайтIа, 2-3 сятдилай ам кьиникь ва я варцаралди начагъ хьун мумкин я.

«Лезги газет»