Вузда ришветбазвилер
И мукьвара Дагъустандин МВД-дин ЦПЭ-ди (экстремизмдиз аксивалдай центр) республикадин кьилин вузрикай сана (малуматда вуздин тIвар кьунвач) тахсиркарвилиз рехъ ганвай дуьшуьшар винел акъудна. Идакай МВД-дин пресс-къуллугъди хабар гана.
Малум хьайивал, университетдин ректорди ва анин администрациядин къуллугъчийри кIелдайбур кьабулунихъ ва кIелзавайбурун имтигьанар санлай вахкунин месэлаяр гьялунихъ галаз алакъалу яз ришвет къачунин къурулуш арадал гъанвай. Идалайни гъейри, тапан документар туькIуьруналди, шак физвайбур вуздиз чара авунвай пулунин такьатар чуьнуьхунал машгъул хьана.
Алатай вацран эхирра талукь органрин къуллугъчийри тади серенжемар кьабулай вахтунда винидихъ чпикай раханвай ксар тахсиркарвал авур макъамда чкадал кьуна. Кьилди къачуртIа, ихтилат университетдик экечIунин карда куьмек гунай къанунсузвилелди пулунин пишкешар къачузвай вахтунда винел акъатай тахсиркарвиликай физва.
МВД-дин къуллугъчийри вуздин къуллугъчийрин кабинетар ахтармишай вахтунда анрай 5 миллион манатдилай артух пул, гьакIни пулар ни ва вуч патал ганватIа кхьенвай «гъавурдик кутунин чарар» жагъана. Малум хьайивал, пуларихъ гилигнавай чарарал студентри гьарда вичин дердидин патахъай кхьенвай: сессия агалун, кIелуник экечIун, кьилди чирвилер къачунин график тайинарун.
Алай вахтунда уголовный дело къарагъарунин месэла гьялзава. Шак физвайбурун амалрик РФ-дин УК-дин 290-статьядин 5-паюна, 159-статьядин 4-паюна къалурнавай тахсиркарвилерин лишанар ква. КIватIнавай материал Россиядин СК-дин РД-да авай силисдин управленидив агакьарнава.
27 ДТП
МВД-дин госавтоинспекцияди хабар гузвайвал, 30-июндилай 6-июлдалди Дагъустанда 27 авария арадал атана. Нетижада 10 кас (гьа жергедай яз 3 аял) кьена ва 47-дал (абурукай 11 аялар я) жуьреба-жуьре хирер хьана.
Госавтоинспекцияди рекьера гьерекат ийизвай вирибуруз къайдайрал амал авуниз эвер гузва.
«Лезги газет»
