4-июлдиз Махачкъалада, Дагъустандин госуниверситетда, машгьур журналист, публицист Алик Абдулгьамидов рикIел хкуниз талукьарнавай межлис кьиле фена. Къейд ийин хьи, ам алай йисан 26-майдиз яргъалди чIугур азардикди Москвада кечмиш хьана. Журналистдин 69 йис тир.
Алик Абдулгьамидов рикIел хкиз и юкъуз ДГУ-да адахъ галаз санал кIвалахай юлдашар, журналистар, жемиятдин векилар, студентар кIватI хьанвай. Абуру рагьметлу журналистдин уьмуьрдикай, адан къилихдиз хас ерийрикай, ада гьазурай репортажрикай, акъудай ктабрикай чпин фикирар лагьана.
«Дагъустан» РГВК-дин генеральный директор Камила Гьамзатовадин гафаралди, Алик Абдулгьамидоваз гьар са дуьшуьшда лагьана кIани гафар чидай. Идалай гъейри, ада кIвалахдин рекьяй вичин юлдашрик квай гъалатIар, абуруз хъел текъведайвал, хъуьтуьлдиз винел акъуддай ва абур туькIуьр хъийидай рекьер къалурдай.
Хейлин йисара ДГУ-дин филологиядин факультетдиз регьбервал гайи профессор Шабан Мазанаева вичин рахунра Алик Абдулгьамидован пешекарвал къейд авунихъ галаз санал, ам кIвалахдив ва вичив эгечIзавай тегьердикайни вичин фикирар лагьана. «Ада гьамиша чпин гафунал кIеви, руьгьдиз викIегь ва хци къилих авай инсанар хкядай, гьикI лагьайтIа, ам вич гьахьтинди тир», — лагьана Ш. Мазанаева.
Мярекатдал рахайбурун арада гьакIни Махачкъаладин мэрдин пресс-къуллугъдин регьбер Гьажимурад Сагитов, Дагъустандин лайихлу журналист Мурад Мегьамедов, Алик Абдулгьамидован хайи стха Низами Абдулгьамидов, «Табасарандин нурар» газетдин кьилин редактор Гуьлагьмед Маллалиев ва масабур авай.
Чи мухбир
