8-июлдиз Дагъустандин Кьил Сергей Меликова Запорожьедин областдин Михайловский округдин кьил Вячеслав Беднякахъ галаз гуьруьш кьиле тухвана. РикIел хкин, чи республикади Украинада кьиле физвай махсус серенжемдин вахтунда еке зиянар хьанвай Михайловский райондиз яшайишдин инфраструктура арадал хкиз куьмекар гузва.
«Михайловский райондихъ галаз чи республикадин 53 лагьай муниципалитетдихъ галаз хьтин дуствилин, сих алакъаяр арадал атанва. Гьана къуллугъзавай чи гадаяр Михайловский райондин чилив чIехи кIанивал ва къайгъударвал аваз эгечIзава. Гьар сеферда анай чи республикадиз мугьманар (гъвечIибур, чIехибур) атайла, чун шад жезва. Дагъустан идалай кьулухъни квез куьмек гуз гьазур я…», — къейдна С.Меликова дуствилин гуьруьшдин вахтунда.
Вичин нубатда Вячеслав Бедняка чпин райондиз куьмекар гунай Дагъустандин кьилевайбуруз сагърай лагьана.
«Дагъустан чи дустарикай тир региондиз элкъвенва. Стхавилин куьмек себеб яз, чалай гзаф крар кьилиз акъудиз алакьнава ва ихьтин дустар хьунал чна лайихлудаказ дамахзава. Эвел кьиляй чна вилик эцигай макьсадарни кьилиз акъуддайдак за умудар кутазва», — лагьана Михайловский округдин кьили.
Къейд ийин хьи, 2023-2024-йисара Дагъустанди Михайловский районда яшайишдин метлеб авай 38 объект цIийикIа туькIуьр хъувуна. Алай йисуз мад 21 объект туькIуьр хъувун фикирдиз къачунва.
Гуьруьшдин вахтунда Вячеслав Бедняка Сергей Меликовав Запорожьедин областдин государстводин кьилин шабагь — «Запорожьедин областдин вилик лайихлувилерай» I дережадин медаль вахкана. Запорожьедин областдин администрациядин патай шабагьриз гьакIни РД-дин эцигунрин, архитектурадин ва ЖКХ-дин министр Бахтияр Уллаев, РД-дин Кьилин ва Гьукуматдин Администрациядин са шумуд къуллугъчи лайихлу хьана.
Агьмед Магьмудов
