Редакциядиз чар
Мукьвара «Лезги газетдин» редакциядиз Хив райондин Цналрин хуьруьн жемятдилай чар атана. 20-дав агакьна чкадин агьалийри къулар чIугунвай чарче вири хуьруьз талукь кар алай месэла къарагъарнава. Агъадихъ чна цналвийрилай атанвай чар тамамдиз гузва.
«Гьуьрметлу «Лезги газетдин» редакция!
Квез и чар кхьизвайди Хив райондин Цналрин хуьруьн жемят я. Керчекдиз рахайтIа, им чар туш, чи тIалабунрикай ибарат арза я. Цналрин хуьр Хив райондик кваз гзаф йисар я. Гьа и кар себеб яз, чал, цналвийрал, жуьреба-жуьре четинвилер ацалтзава.
Сад лагьайди, рекьин патахъай. Са дерди-бала хьайила, райондин центрадиз — Хивдиз — фена кIанзава. Амма и хуьруьз фидай улакьар чи хуьряй гьар кткана жезвач. Рагъ авайлани, марф къвазвайлани, улакь вилив хуьз, рекьел акъвазуниз мажбур жезва.
Кьвед лагьайди, духтурханадин патахъай. Начагъ хьайи дуьшуьшра тади куьмекдин улакьдиз эвер гун акьалтIай муракаб месэладиз элкъвезва. Хивдай улакь агакьдалди, хейлин вахт жезва, са гафуналди, куьмек вахтунда агакьзавач. Месэлаяр мадни ава, чна анжах кьилинбур къейднава.
Тарихдиз вил вегьейла малум жезвайвал, Цналрин хуьр виликан Кьасумхуьруьн (гилан СтIал Сулейманан) райондихъ галаз алакъалу тир. Чи хуьруьн мулкарни СтIал Сулейманан райондик акатзавай Ичинрин, Цмуррин мулкарин часпардиз мукьва я. Цналвийрикай бязибуру «Рычал-су» заводда, бязибуру СтIалрин багълара зегьмет чIугвазва, чпин кьил хуьзва. Герек затI-матI маса къачудайлани, парабур Кьасумхуьрел физва, гьикI лагьайтIа, Хивдиз фидалди, СтIал Сулейманан райондин центрадиз фин регьят жезва.
Цналрин хуьр Хив райондин администрациядик тIвар патал кутунвайди хьиз аквазва. Я рехъ авайди туш, я улакь. Са чар-цIар герек хьайила, райондин администрацияда дерди-бала акъатайла, Хивдиз фин акьалтIай четин имтигьандиз элкъвезва. Гьи рекьяй къачуртIани, — кIантIа здравоохраненидин, кIантIа алишверишдин, яшайишдин — Кьасумхуьрел фин регьят я.
И кар фикирда кьуна, чна, эгер жедай кар ятIа, Цналрин хуьр, Хив райондин администрациядикай хкудна, СтIал Сулейманан райондин администрациядик кухтун тIалабзава.
Гьуьрметлу «Лезги газетдин» редакция! Чи арзадиз фикир гана, и месэла республикадин гьукумдин органрин вилик къарагъарнайтIа кIанзавай», — кхьенва цналвийрин чарче.
Редакциядин патай
Дагъустандин кьилевайбуру республикада яшамиш жезвай агьалийрин яшайишдин шартIар къулайбур хьуниз, уьмуьрдин ери хкажуниз кьетIен фикир гузва. Винидихъ гъанвай чарчяй якъин жезвайвал, цналвийрин яшайишдин шартIар са акьван къулайбур туш. И месэладикай, гьелбетда, сифте муниципалитетдин, гуьгъуьнлай республикадин дережадин гьукумдин органриз хабар гун герек я. И кар фикирда кьуна, чна Цналрин хуьруьн жемятдиз урус чIалал гьазурнавай чар, чкадин агьалийрин къуларни алаз, Хив, СтIал Сулейманан районрин администрацийриз, Дагъустандин Кьилин Администрациядиз, Гьукуматдиз ва Халкьдин Собранидиз рекье тун теклифзава. «Лезги газетдин» редакциядини вичин нубатда, Цналрин хуьруьн жемятдилай агакьнавай чарчин бинедаллаз гьазурнавай чар винидихъ къейднавай органриз рекье твада.
