Мад яракьар гуда

США-дин оборонадин министерстводин векилди малумарнавайвал, Пентагонди Украинадиз яракьар ракъурун давамарда. Идакай «РИА Новости» чешмеди хабар гана. Къейд ийин, эхиримжи йикъара америкавийри Ук­раинадиз яракьар агакьарзамачир. «Мягькем ислягьвал тайинарунал ва кьиникьар акъвазарунал кIва­­лахдалди, Украинадин агьалийривай чеб хуьз хьун патал, оборонадин министерстводи Трампан буй­ругъ­далди Украинадиз алава яракьар рекье твада», — кхьенва Пентагондин сайтда чапнавай малуматда.

«Politico» газетдин делилралди, яракьар агакьарунин кар кьве уьлкведин векилар Италияда ва Украинада гуьруьшмиш хьайидалай кьулухъ и ва къведай гьафтеда гуьнгуьна гьат хъийида.

Алатай саласадиз США-дин президент Д. Трампа Киевдиз гзаф яракьар гун хиве кьунай, сифте нубатда — оборонадин такьатар.

Украинадиз дяведин суьрсетар ва яракьар ракъур тахвуникай США-дин терефди июлдин сифте кьилера малумарнай. Лацу кIвалин векилди Америкадин игьтият патал хуьзвай яракьрин кьадар тIимил жезвайдакай делилар гъанай. РФ-дин Президентдин пресс-секретарь Д. Пес­ко­ва­ къейд авурвал, ВСУ-див яракьар гьикьван тIимил ву­гайтIа, гьакьван фад махсус серенжемдин эхир мукьвал жеда.

Арайра къайивал гьатзава

Эхиримжи йикъара Россиядинни Азербайжандин алакъаяр чIур жезвайдакай малумарзавай хейлин хабарар гьар жуьре СМИ-ра пайда жезва.

27-июндиз Екатеринбургда 50 азербайжанви кьуна (абурун чIехи пай Россиядин ватандашар я). Абурал 2001-йисуз ери-бине Азербайжандай тир Юнис Пашаев яна кьинай шак физва. Идакай «Лента.ру» чешмеда кхьенва.

Гуьгъуьнлай Свердловскдин областдин силисдин комитетдин управлениди са шумуд кьиникьихъ ва рекьиз кIан хьунин алахъунар авунихъ, гьакIни Уралда­ ичкидикди гзаф ксар зегьерламиш хьунихъ галаз ала­къалу яз шак физвайбурун десте дуьздал акъудайдакай хабар гана. Кьурбурукай 6 кас дустагъда ацукьарна­.

1-июлдиз Россияда авай Азербайжандин векил­диз РФ-дин МИД-диз эверна. Гуьгъуьнлай Азербай­жанда кьиле фин мумкин тир Россиядихъ галаз ала­къалу медениятдин вири мярекатар къадагъа авуна. ГьакIни Бакуди «Sputnik Азербайжан» агентстводин идарада рейд кьиле тухвана. Гуьгъуьнлай Азербайжандин СМИ-ри агентстводин къуллугъчийрик гуя ФСБ-дин 2 агент ква лагьай хабар раижна. Къуншидаллай уьлкведин бязи журналистри Россиядиз акси векъи ихтилатризни рехъ гана.

Уьлквейрин арада авай гьалар алатай йисуз AZAL авиакомпаниядин самолет аватайдалай кьулухъ­ дегиш ­жез башламишна. А чIавуз 38 кас кьенай. Азер­байжан­ди самолет чилелай ягъунин нетижада аватна лагьанай. Гуьгъуьнлай В. Путин ва И. Алиев телефондай раханай ва Россиядин Президентди арадал атай агьвалатдихъ галаз алакъалу яз багъишламишунин гафар лагьанай. ГьакI ятIани, алакъаяр виликан хьтинбур яз амукьнач.

1-февралдиз Азербайжандин вилик-кьилик квайбуру Бакуда авай Урусрин кIвал агалуникай ва Россот­рудничестводин кIвалах акъвазаруникай малумарна.

Нетижасуз алахъунар

Украинадин яракьлу кьушунри мад Курскдин областдиз гьахьунин алахъунар авуна. Идакай и йикъара «Два майора» телеграм-каналди хабар гана.

Душмандин гьужумдин вилик пад Сумский областдин Бессаловка хуьруьн мулкара кьуна. Чешме­ди гьакIни Белгороддин областдиз ВСУ-ди дронар гзаф ахъайзавайдакай хабар гузва.

РФ-дин оборонадин министерстводи 7-июлдин йифиз чи уьлкведин регионрал ВСУ-ди ахъаяй 91 дрон ПВО-ди ягъайдакай хабар гана. Душманди беспилотникар гьар юкъуз гзафни-гзаф Курскдин ва Белгороддин областрин мулкарихъ ахъайзава.

Нетижа гудач

Украинадин виликан президент Л. Кучмадин меслятчи хьайи О.Соскинан гафаралди, Киевди мобилизациядин гьакъиндай конституциядиз акси къайдаяр къуватдай вегьин герек я, вучиз лагьайтIа, гужуналди армиядин кьадар артухаруни нетижа гудач. Идакай «Лента.ру» чешмеди хабар гузва.

К. Ферзалиев