Мукьвара Россиядин Президент Владимир Путинан Указдалди СтIал Сулейманан райондин Кьасумхуьряй тир Султан Сулеймановаз (кьейида­лай кьулухъ) Россиядин Игитдин тIвар гана. Ам Украинада кьиле физвай махсус серенжемда иштиракзавай дагъустанвийрикай и тIварцIиз лайихлу хьайи цIукьуд лагьай кас я.

Султан Сулейманович Сулейманов­ 1997-йисан 28-июлдиз Кьасумхуьрел дидедиз хьана. Адахъ гьеле мектеб­да кIелзавай йисара вичин уьмуьр военный­ пешедихъ галаз алакъалу ийидай­ фикир авай. И къастуни ам Москвадиз, Суворован тIварцIихъ галай Высший воен­ный командный училищедиз акъудна­­. Университет хъсан къимет­ралди­­ акьал­тIарай Султан къуллугъ ийиз­ Юж­но-Са­халинскдин частуниз­ фена. РФ-дин Яракьлу Къуватрин офицерди Украинада кьиле физвай махсус серенжемда ам гатIунай сифте йикъарилай иштиракзавай. ЛНР-да ва ДНР-да, гьужумдин дестедин командир яз, къуллугъдин везифаяр тамамарна. 2024-йисан 19-ноябр­диз Богоявленко хуьруьн­ патарив кьиле­ фейи женгина кьегьалвилелди телеф хьана. 2024-йисан 22-ноябр­диз ам Кьасумхуьруьн (ЦIийи поселокдин микрорайондин) сурара кучукна.

27 йис хьанвай Султан Сулейманова СВО-да сифте йикъарилай кьетIен дирибашвал, жуьрэтлувал къалурна. Женгера лайихлувилерай адаз кьве сеферда «Жуьрэтлувиляй» орден гана, ам гьукуматдин маса шабагьриз, гвардиядин подполковникдин чиндиз лайихлу хьана. Жегьил офицерди гьужумдин дестедиз регьбервал гузвай. Адахъ галаз санал къуллугъзавайбуру, дустари рикIел хкизвайвал, Султан Сулейманов неинки виниз тир пеше­карвилелди, гьакIни инсанвилин кьетIен­ къилихдалди, хесетралди тафаватлу жезвай. Ам гьамиша масадаз куьмекдиз къвез гьазур тир, ада датIана вичихъ галаз санал къуллугъзавай юлдашрин тереф хуьзвай, четинвилеризни килиг тавуна, кьегьал подполковникди вилик эцигай везифаяр агалкьунралди кьилиз акъудзавай.

«Дагъустанви Султан Сулейманов — Россиядин Игит. Ада вичин чан Ватан патал къурбандна, СВО-да иштиракзавай дагъустанвийрикай ам аскервилин чIехи тIвар къачунвай 14 лагьай ватан­эгьли я.

Телеф жедалди тIимил вахт амаз Султаназ подполковникдин чин гана. Ада гьужумдин дестедиз регьбервал гузвай, десте женгиниз пешекарвилелди ва викIегьдиз тухузвай, гьа са вахтунда гьар са аскер хуьзвай. Адахъ галаз кIвалахайбуру ва дуствилин алакъаяр хвейибуру Султан Сулейманов анжах регьимлу, хъсан келимайралди рикIел хкизва…

…Султанан тарих — им неинки кьегьалвилин чешне, гьакIни вири Дагъус­тандин халкьарин руьгьдин къуват къалурзавай лишан я. Хайи республикадин, зурба уьлкведин лайихлу хва чIехи авур Игитдин диде-буба сагърай! Россиядин Игит Султан Сулеймановаз баркалла!­ Ам чи рикIера эбеди яз амукьда!», — кхьенва Дагъустандин Кьил Сергей Меликова вичин телеграм-каналда Султан Сулеймановакай.

Мукьвара СтIал Сулейманан райондин кьил Саид Темирханов вичин заместитель АбутIалиб Фатулаевни галаз Игитдин хизандиз мугьман хьана. Райондин кьилевайбуру нубатдин сеферда Сулеймановрин хизандиз башсагълугъвал гана, Ватандин кьегьал хва чIехи авунай диде-бубадиз сагърай лагьана ва муниципалитетдин администрация гьамиша алакьдай куьмекар гуз гьазур тирди малумарна. Саид Темирханова гьакIни мукьва-кьилийрихъ галаз санал Игитдин экуь къамат эбеди авунин месэла веревирдна. Кьилди къачуртIа, райондин администрацияди Султанан гьуьрметдай мемориалдин кьул туькIуьрун ва адан тIварцIихъ Кьасумхуьруьн са куьче ягъун­ теклифна.

«Россиядин Игит Султан Сулейманова женгера къалурай  жуьрэтлувилер ва виниз тир тербиядин ерияр къуллугъдин рекьяй юлдашриз намусдин акьалтIай чешне жеда. Ватандиз Султанан вафалувал ам чидай ва алай вахтунда чи уьлкведин хатасузвални азадвал патал женг чIугун давамарзавай вирибурун рикIера амукьда.

Султан Сулейманов халис ватанперес тир. СтIал Сулейманан  районди вичин Игитдал дамахзава. Султан гзаф несилрин рикIера амукьда, ада тунвай экуь ирс давамарда», — къейдна Саид Темирханова.

…Вичин девирда машгьур писатель Максим Горькийди лагьанай: «Уьмуьрда игитвал къалуруниз гьамиша чка жагъида».

СВО кьиле физвай девирда и гафарин гьахълувал генани якъин жезва. Винидихъ къейд авурвал, Султан Сулейманов СВО-да Россиядин Игит лагьай тIвар къачунвай 14 лагьай дагъустанви я. Гьа­йиф хьи, абурукай чIехи паюниз и тIвар кьейидалай кьулухъ ганва.

Забит Ризванова вичин «Весида» кхьенвайвал, «Халис Игитдиз вичин ви­кIегьвиликай хабар жериди туш: адан игитвал кьатIудайбур несилар я». Лугьуда хьи, вири вахтуниз муьтIуьгъ я. Амма игитвал я вахтуниз, я са куьнизни муьтIуьгъ туш. Игитвал эбеди я.

Хазран Кьасумов