Школьникрин гад
Гад йисан виридалайни хъсан вахтарикай сад я. Школьникриз и вахт иллаки гзаф кIанда. ГьикI лагьайтIа, кIелунин йис куьтягь хьайидалай гуьгъуьниз абуру ял язава. Лагерра ял ягъун, чпин вахт менфятлудаказ кечирмишун школьникар патал мадни шад вахт я.
Алай йисуз СтIал Сулейманан районда 5 школада аялрин лагерар ачухнава: Кьулан СтIалрин СОШ-да — «Чубарук», Агъа СтIал-Къазмайрин — «Дружба», Герейханован 2-нумрадин мектебда — «Веселые каникулы», Цмуррин СОШ-да — «Солнечная долина» ва Алкьвадрин школада — «Солнышко».
Школьникрин лагерар ачухунин шад мярекатра райондин кьил Саид Темирханова, адан 1-заместитель Заур Къагьриманова, образованидин управленидин пешекарри, школайрин муаллимри, аялрин диде-бубайри иштиракна.
ЦIи 5 лагерда йикъан вахтунда 550-далай виниз аялри ял яда. Сифте нубатда лагерриз СВО-дин иштиракчийрин, гьакIни женгинин гьерекатар кьиле физвай чкайрай хканвай, гзаф аялар авай ва агьвал тIимил тир хизанрай тир аялар кьабулда.
ЦIи лагеррин кIвалах Ватан хуьзвайбурун йисан сергьятра аваз кьиле физва. Гьавиляй аялар ватанпересвилин руьгьдаллаз тербияламишуниз кьилин фикир гузва.
Аялриз лагерра кьве сеферда чими тIямлу хуьрекар гузва, машгъулардай ва аялрин зигьин хъсанардай мярекатар, конкурсар, спортдин акъажунар тухузва, машгьур инсанрихъ галаз гуьруьшар, музейриз ва тарихдин метлеб авай чкайриз экскурсияр тешкилзава. Са гафуналди, аялар патал туькIуьрнавай программа гегьеншди, мярекатрив ацIанвайди я.
Лагерра ял язавай аялрикай рахадайла, ихьтин са кар къейд ийиз кIанзава. И йикъара Кьасумхуьрел СтIал Сулейманан тIварунихъ галай Лезгийрин музыкадинни драмадин гьукуматдин театрдин артистрин са десте мугьман хьана. И. Тагьирован тIварунихъ галай культурадин имаратдин чIехи залда, лугьуз жеда хьи, артистринни лагерра ял язавай аялрин гуьруьш кьиле фена. Аялар театрдин директор Динара Эминовади тебрикна, абуруз хуш келимаяр лагьана.
Идалай гуьгъуьниз шаир Азиз Мирзебегова цIинин йисуз 120 йисан юбилей къейдзавай театрдин тарихдикай, и йисара сегьнеда эцигай тамашайрикай, театрда кIвалах авур ва кIвалахзавай режиссеррикай, артистрикай суьгьбет авуна.
Рахунрилай гуьгъуьниз театрдин артистри лагерра ял язавай аялриз хъсандиз сегьнеламишнавай Ю. Фонвизинан «Недоросль» тамаша къалурна. Ам аялриз гзаф бегенмиш хьана, абуру ягъай гурлу капари артистрин гуьгьуьларни шадарна.
Тамаша аялриз пулсуздаказ къалурна, вири харжияр «Иман» фондуни вичин хивез къачунвай.
Аквазва хьи, районда ачухнавай лагерра кIвалах хъсандиз тешкилнава.
Хазран Кьасумов
