Украинада кьиле физвай махсус серенжемдин иштиракчийриз, абурун хизанриз яшайишдин жуьреба-жуьре рекьерай куьмек авуниз республикада кьетIен фикир гузва. Кьилди къачуртIа, абуруз гьукуматдин патай са жерге кьезилвилер тайинарнава, мергьяматлувилин серенжемар тешкилзава.
Гьа ихьтин мярекатрикай сад мукьвара Мегьарамдхуьруьн райондин Советский хуьруьн мискIиндани кьиле тухвана. Анин имам Сулейман Пашаевни хуьруьн администрациядин кьил Эмирагъа Асваров СВО-да телеф хьайи Эскендер Агъасиеван хизандиз мугьман хьана. Абуру телеф хьайи аскердин хендеда Беневшадиз, адан веледриз башсагълугъвал гана, Агъасиеврин хизандал недай-хъвадай суьрсет агакьарна ва аялдиз велосипед пишкешна.
«Етимрин, хендедайрин, игьтияж авайбурун къайгъударвал авун Сад Аллагьдин патай еке суваб я. Ихьтин хизанар рикIелай алуд тавун, абуруз алакьдай куьмекар гун чи умуми буржийрик акатзава. Агъасиеврин хизандал кьил чIугун чавай жезвай ва чна авуна кIанзавай кIвалахрин са гъвечIи пай я. Къуй Аллагьди чи мергьяматлувилин серенжем кьабулрай, и хизандиз сабур гурай.
Игьтияж авайбуруз куьмекиз чун гьамиша гьазур я. Гьам шадвиле, гьамни бедбахтвиле къуй чи уьммет сад хьурай. Амин!» — лагьана Советский хуьруьн имам Сулейман Пашаева.
Агьмед Магьмудов
