СтIал Сулейманан райондин Бутхуьре мукьвара аялар патал шад ва гурлу мярекат кьиле тухвана. Ам республикада ва адалай къеце машгьур Ханбалаеврин тухумдин векил Мурад Назимовича вичин пулунин такьатрихъ тешкилнавай.
Мярекатдиз Шихидхуьруьн администрациядик акатзавай 5 хуьряй аялриз теклифнавай. Абуруз милли хуьрекар, ширинлухар алай суфраяр ачухнавай, машгъулардай жуьреба-жуьре серенжемрикай ибарат программани гьазурнавай.
Мярекатдал гзафбур рахана. Абурун арада Дагъустандин халкьдин шаир Майрудин Бабаханов, райондин образованидин управленидин начальник Гьуьсейн Шихбабаев ва масабур авай.
«Аялар чан алай цуьквер я. Аялризни яшлубуруз къулай шартIар тешкил тийизвай гьукуматда берекат жедач», — къейдна вичин рахунра М. Бабаханова.
Мярекат геждалди давам хьана. Ихьтин суварри чи акьалтзавай несилрин аялвал бахтлуди ва итижлуди ийизва.
Хазран Кьасумов
