И йикъара Кеферпатан Македониядин Скопье шегьерда кьуршахар кьунай (азад­даказ, грекринни римлуйрин жуьреда ва дишегьлийри) 18 йисал къведалди яшара авайбурун арада Европадин кIвенкIвечивал патал кьиле фейи акъажунра чи ватанэгьлийрини устадвал къалурна. ИкI, чпин агалкьунрикай кIелдайбурув чна мукьвал-мукьвал хабарар агакьарзавай, спортдин са шумуд жуьредай вичин къуватар ахтармишза­вай ва хъсан нети­жаяр къалурза­вай Саид Пашаев (КцIа­рай тир ам Азербайжандин патай экъечIзава) 92 кг-дин заланвал авайбурун арада азаддаказ кьур­шахар кьунай — къизилдин, Махач Аб­дуллаев (ада 55 кг-дал къведалди заланвал авайбурун арада къуватар ахтар­мишна) гимишдин медалриз лайих­лу хьана.

Cпортдин кесерлу майданда С. Паша­ева гъалибвал къазанмишнавайди сад лагьай сефер туш. ИкI, алатай йисуз Сербиядин Нови-Сад шегьерда кьиле фейи акъажунра ам грекринни римлуйрин жуь­реда кьуршахар кьунай Европадин кIвен­кIвечивилин тIварцIиз лайихлу хьанай. Сифтегьан 4 бягьсина гъалибвилер къазанмишай, абурукай 3 вахт куьтягь жедалди акьалтIарай Саидаз финалда бягьсиниз экъечIнавай Сербиядай тир С. Кожич 8:0 гьисабдалди кумукьнай. Ана азаддаказ кьуршахар кьунай кьиле фейи акъажунра къизилдин медаль Агъаширин Агъа­шириновани къазанмишайди рикIел хкиз кIанзава. 2022-йисуз Хорватиядин меркез Загребда 15 йисал къведалди яшда авай жаванрин ара­дани С. Пашаева (85 кг) Европадин кIвен­кIвечивилин тIвар къазанмишнай.

ЦIи ярумчух финалда Саид Пашаеваз Давид Луцков (Украина) — 10:0, финалда Абдуразакь Шабанов 5:6 гьисабралди кумукьна.

Махачкъалада Гьамид Гьамидован тIварунихъ галай спортшколада вичин устадвал хкажзавай, жуьреба-жуьре турнирра ва кIвенкIвечивал патал акъажунра хъсан нетижаяр къалурзавай Махач Абдуллаев Европадин чемпионатдин къизилдин медалдивай са баллдин тафаватди къакъудна. ИкI, ярумчух финалда чи ватанэгьлидиз Темури Тутарашвили (Гуржистан) 10:4 гьисабдалди кумукьнай. Азербайжандай тир Руслан Ализадедихъ галаз кьиле фейи финал лагьайтIа, 2:3 гьисабдалди акьалтIна.

Рагнеда Рамалданова