Алатай гьафтедин ял ядай йикъа­ра­ СтIал Сулейманан райондин КIвар­ча­гъа, бокс вилик тухудай Гь. Аллагьвер­диеван тIварунихъ галай центрада, боксдай Европадин кIвенкIвечивал па­тал акъажунрин гъалибчи, спортдин­ международный классдин мастер Артур Сефиханован пишкешар патал 2010-2011-йисара дидедиз хьанвай жаванрин арада Вирироссиядин турнир кьиле тухвана.

Уьлкведин са шумуд шегьердай, гьа гьисабдай яз, Пятигорск, Норильск, Саратов, гьакIни Дагъус­тандин шегьеррай­ни (Махачкъала, Кас­пийск, Избербаш, Дербент, Буйнакск) районрай (СтIал Су­лейманан, Дербент, Хунзах, Мегьарамдхуьруьн, Дахадаев, Бабаюрт ва мсб) тир 32 командадик кваз вири санлай 115 спортсменди заланвилин­ 20 категориядай чпин гъу­тарин къуватар къалурна.

Турнирдин багьа мугьманрин арада Дагъустандин боксдин федерациядин регьбер Т. Ибрагьимов, СтIал Сулейманан райондин кьил С. Темирханов, райадминистрациядин спортдин, туризмдин ва жегьилрин крарин рекьяй комитетдин директор Ч. Абдулмежидов, жуьреба-жуьре чемпионатрин гъалибчияр, гьа гьисабдай яз грэпплингдай дуьньядин чемпион Я. Межидов, спортдин школайрин директорар, машгьур спортсменар ва масабур авай.

Акъажунрин спонсорар А. Сефиханован багърияр ва ярар-дустар тир. Абурун тешкилатчи, Дагъустандин лайихлу тренер Альберт Межидовахъ галаз турнирдилай кьулухъ кьиле фейи суьгьбетдай малум хьайивал, жаванрин гьазурлухвилелай, абуру рингда къалурай алакьунрилай судьяйри разивал къалурна. Абурун арада кесерлу жуьреба-жуьре майданра чпихъ хъсан нетижаяр хьанвайбурни тIимил авачир. КьетIендаказ мадни а кар къейд ийиз­ кIанзава хьи, яргъарай атанвай 80 спорт­смен ва абурун тренерар патал «Авадан» мугьманханада тамам 3 юкъуз пулсуздаказ яшамиш жедай мумкинвал яратмишнавай. Турнир кьиле физвай вири 3 юкъузни спортсменриз ва тренерриз спорткомплексда пулсуздаказ тIуьнар гана.

Хъсан тешкиллувал ва вини дере­жада аваз кьиле фейи турнирда чIехи тренер А. Межидован регьбервилик кваз Кьиблепатан Дагъустандин команда 1-чкадиз лайихлу хьана. КIвенкIвечи чкаяр кьур командайриз талукь дережайрин медалар, грамотаяр ва пулдин пишкешар, гьакIни виридалайни хъсан боксёрриз ва абурун тренерризни махсус пишкешар, 1-чка кьур командадиз лагьайтIа, чемпионвилин чIул, Каспийск шегьердин депутатрин собранидин председателдин тIварунихъай турнирдин виридалайни хъсан командайриз 15, 10 ва 5 агъзур манатдин кьадарда аваз пулар гана. Акъа­жунра иштиракай багьа мугьманрикай хейлинбуруни жаван спортсменар пишкешар гуналди шадарна.

Рагнеда Рамалданова