Аялар хуьнин йикъан вилик чун Дербент шегьерда авай «Виноград» кафе-ресторанда аялриз талукьарнавай суварин мярекатда «Сад тир Россия» партиядин чкадин политсоветдин член, 11-нумрадин сифтегьан отделенидин секретарь Луиза Саидалиевна Гьажимегьамедовадихъ галаз таниш хьана.

И мярекатда «Сад тир Россия» партиядин активистрихъ галаз санал шегьердин собранидин депутатрини иштиракна. Адет хьанвайвал, абуру аялриз къиметлу пишкешар, ширинлухар гана, санал суьгьбетарна, герекбуруз куьмекдин гъил яргъи авуна.

Мярекатдилай гуьгъуьниз чи арада суьгьбет хьана.

Луиза 1984-йисуз Къазахстан ССР-дин Шевченко шегьерда бине Татарханрин хуьряй тир Саидалидин хизанда вад лагьай аял яз дидедиз хьана. 2000-йисуз ам вичин диде-бубадихъ галаз Дагъустандиз хтана. СтIал Сулейманан райондин Уллу-Гъетягърин юкьван мектеб чешнелудаказ акьалтIарна. 2001-йисуз Дагъустандин Гос­педуниверситетдик экечIна. Вуз ада яру дипломдалди акьалтIарна.

Диплом гъиле авай Л. Гьажимегьамедо­ва Актау шегьерда авай «Мунайспецэлектромонтаж» фирмада ингилис чIалан таржумачивилин кIвалахал акъвазна. Кьве йисалай ам Дагъустандиз хтана. 2008-2022-йисара ада ингилис чIалай репетитор яз кьилдин касдин мектебда, Дербентдин педколледжда муаллимвиле, Дербентдин гумани­тарный институтда факультетдин деканвиле кIвалахна, «Ингилис чIал», «Ингилис чIалан тарсар тухунин къайдаяр», «Сравнительная типология», «Лингвострановедение» «Межкультурная коммуникация» рекьерай  тарсар гана.

2022-йисалай ада Дербентдин педколледждин директордин тербия гунин рекьяй заместителвиле ва ингилис чIалан муаллим яз зегьмет чIугвазва.

Луизади тухузвай жемиятдин кIвалахрал акъвазин. Малум хьайивал, ада «Сад тир Россия» партияди фадлай тестикьарнавай «Гафаралди ваъ, краралди» девиздал­ амал авуна, гьар жуьре кIвалахар уьмуьрдиз кечирмишзава. Партиядин проектар гьар са инсандин ва халкьдин хушбахтвал хкажунихъ элкъуьрнавайбур я. Къенин юкъуз­ Украинада кьиле физвай дяведин  махсус серенжемдин иштиракчийриз ва абурун хизанриз куьмек гун  гьукуматди вичин важиблу везифайрикай сад яз кьунва, и рекьяй еке  кIвалах тухунни ийизва.

Луиза Саидалиевна «Сад тир Россия» партиядин чкадин политсоветдин член, XVII съездин делегат, 11-нумрадин сифтегьан  отделенидин секретарь, региондин «Халкьдин фронт» штабдин координатор я. Ада, вич кIвенкIве аваз, «Сад тир Россия» партиядин шегьердин депутатарни желбна, са шумудра СВО-да къуллугъзавай аскеррин хизанриз продуктар кIватIна ва пайна. Гуманитарный куьмек яз, фронтдиз продуктар ва лазим маса шейэр ра­къурна. И кIвалахар ада алай вахтундани давамарзава.

Винидихъ къейднавай крарилай гъейри, адет хьанвайвал, чпин сагъламвилин­ мумкинвилер сергьятламиш тир аялриз су­варар­ тешкилзава, реабилитациядин цент­рада­ авай яш тамам тахьанвай аялрал кьил чIугвазва, абуруз пишкешар гузва, утренникар тешкилзава, агьвал тIимил тир хизанрин кIвалериз физ, аялрин мурадар кьилиз акъудзава, «Елка желаний», «Новый год в каждый дом», «Поздравь ветерана» серенжемра иштиракзава.

— Луиза Саидалиевна, чаз ван хьайивал, куьне Дербент шегьерда амай Ватандин ЧIехи дяведин са ветерандал мукьвал-мукьвал кьил чIугвазва. Ам вуж я? — хабар кьуна за.

— Адетдин югъ, суварин югъ талгьана, чун мукьвал-мукьвал адал кьил чIугваз физва. Дерди-гьал чирна, вири тIалабунар кьилиз акъудзава. Исакьова Антонина Александровна Ватандин ЧIехи дяведин ветеран, далу патан фронтдин зегьметчи, ветерандин хендеда я. Ам 1927-йисуз дидедиз хьана. Дяведин вахтунда ада госпиталда медсестра яз кIвалахна. Адан зегьмет «За боевые заслуги» медалдалди къейднава. Дяведилай гуьгъуьниз ам вичин итимдихъ галаз яшамиш жез Дербент шегьердиз ­хтана.

Луиза муаллимдин чIехи буба Гьажи­къурбан Гьажимегьамедов Ватандин ЧIехи дяведин иштиракчи, «Александр Невскийдин» ва «Ватандин дяведин сад лагьай дережадин» орденрин сагьиб я. ЧIехи диде, Абейдуллаева Биги, «За оборону Кавказа», «Ватандин чIехи дяведин йисара чIугур баркаллу зегьметдай» медалрин,  «Соцсоревнованидин гъалибчи» (1976) лишандин сагьиб хьана.

Муаллимвилин рекье къазанмишнавай агалкьунар, жемиятдин арада активнидаказ тухузвай кIвалахар Луиза Саидалиевнадал чIехи бубадилайни чIехи дидедилай атанвай ирс я.

— Бубайри Ватандин ЧIехи дяведа къалурай кьегьалвилер чна садрани рикIелай алудна кIандач, — лугьузва ада. — Чи акьалтзавай несилдик, жегьил-жаванрик Ватан­ кIан хьунин гьиссер кутун патал абур жуь­реба-жуьре акцийрал желбзава. Афгъанис­тандин, СВО-дин ветеранрихъ галаз гуьруьшар тешкилзава.

Алай четин девирда, Ватандин ЧIехи дяведин вахтунда хьиз, чаз генани гзаф ватанпересар герек я. Россиядин гележег хьиз, Дагъустандин гележегни акьалтзавай несилдин ватанпересвилин руьгьдилай аслу я.

И жигьетдай ватанпересвилин руьгьдаллаз тербияламишунин кье­тIен жавабдарвал чирвилер гудай идарайрин хиве ава. Луиза муаллимди, тербиядин рекьяй директордин заместитель, гьакIни партиядин активист ва «Халкьдин фронтдин» координатор яз, классдилай къеце тухузвай «Аскердиз чар», «Важиблу ихтилатар», «Кьегьалвилин тарсар» мярекатра активнидаказ иштиракзава. Студентрин арада ихтилатар ийиз­ва, ватанпересвилин мярекатар, викторинаяр тешкилзава. Ада гьар йисуз тухузвай «Гъалибвилин диктантдани» иштиракзава.

«Халкьдин фронтдин» кооррдинатор яз, Луиза Саидалиевнади жемятдин месэлаяр гьялиз куьмекзава, СВО-дин иштиракчийрин хизанрихъ галаз санал кIвалахзава, гьакIни активлу жегьилар желбна, сун гуьлуьтар, шарфар, элжекар храдай кружок тешкилна. Гьазур хьайи сун шейэр, гуманитарный куьмек яз, Дагъустандин гуьгьуьллубурун «Каспий» батальондиз, гьакIни Донецкдин ва Запорожьедин областра махсус серенжемда иштиракзавай аскерриз ракъурна.

«МКД-ра яшамиш жезвайбур» проект­дин сергьятра аваз, партиядин активистри, кьилди къачуртIа, сифтегьан отделенийрин секретарри депутатрихъ галаз санал, гзаф квартирайрикай ибарат кIвалера яшамиш жезвай агьалийрихъ галаз гуьруьшар тешкилзава, кар алай месэлаяр веревирдзава, бязи месэлаяр гьялиз алахъзава. Тежрибади къалурзавайвал, ихьтин гуьруьшри сад-садав агудзава, икI  ихтибарвилин гьиссер арадал гъизва.

— «Сад тир Россия» партияди тухузвай кIвалахдикай яргъалди ва гзаф рахаз жеда, — лугьузва Луиза Саидалиевнади. —  Кьилинди ам я хьи, партияди тухузвай вири кIвалахар, проектар халкьдин, уьлкведин хушбахлувилихъ элкъуьрнава. Иниз килигна, чна вирида чи уьлкведин регьбер, халис ватанперес, РФ-дин Президент Владимир Владимирович Путинан тереф хуьзва.

Акьалтзавай несил ватанпересар яз тербияламишунай, жемиятдин арада еке кIвалах тухунай, партиядин проектра активнидаказ иштиракунай, махсус серенжемда авай аскерриз гуманитарный куьмек  ракъурунай Л. Гьажимегьамедова РФ-дин Президентдин, Дагъустан Республикадин Кьилин, РД-дин жегьилрин, милли сиясатдин крарай министррин, Дербент шегьердин администрациядин  кьилин Разивилин чарариз лайихлу хьанва.

Гила Луиза Саидалиевнадин муаллимвилин ва директордин заместителвилин кIва­лахрикайни са кьве гаф лугьун.

Луиза Саидалиевна 18 йисан тежриба авай кьилин категориядин муаллим, виниз  тир дережадин пешекар я. Ада студент­рихъ галаз ачух тарсар, мастер-классар, семинарар тухузва. Вичин тежрибадикай кIва­лахдин юлдашризни пай гузва. Ам жегьилрин насигьатчини я.

Педколледждин директордин кIелунрин кIвалахдин рекьяй заместитель Н. Магьмудовади лугьузвайивал, Луиза Саидалиевна тежрибалу, гьар са кIвалахда гьамиша муаллимвилин устадвал тамамвилихъ агакьарзавай педагог я. Ада студентар тежрибадин,  методикадин ва чирвилерин патахъай вини дережада аваз гьазурзава. Гьамиша вичин пешекарвилин дережа хкажзава, педагогикадин цIийивилер кIвалахда савадлудаказ ишлемишзава.

Дербентдин педколледждин директор Д. Аскендеровади Луиза Саидалиевнадикай икI лагьана: «Ам кьилин дережадин пешекар, хивевай кар кьилиз акъудун патал вири къуватар желбзавай, зегьметдал рикI алай педагог я. Ада Дагъустандин образованидин дережа хкажуник, акьалтзавай ­несил тербияламишуник лайихлу пай кутазва».

Яргъал йисарин гьакъисагъ зегьметдай Луиза Саидалиевна  «Дагъустан Рес­публикадин образованидин отличник» лагьай гьуьрметдин тIварцIиз лайихлу хьанва. Къуй вичихъ мадни еке агалкьунар ­хьурай!

Къагьриман  Ибрагьимов