Алай вахтунда, ашукьдин саз хурудал кьуна, халкьдин вилик межлисра, сегьнейра экъечIзавай Адил, Айдун, Алихан, Рустам, Къагьир, Расул, Эсфира, Симсар гзафбуруз чида. Абурун арада ашукь Шемширани кьетIен чка кьазва. Вичин къуватлу, ширин сесиналди манияр лугьунихъ, устадвилелди чуьнгуьр ягъунихъ галаз сад хьиз, Шемшира чIаларни теснифзава. Маса ашукьрив гекъигайла­, им адан кьетIенвални я.  Ингье и йикъара, писатель, композитор, таржумачи Мурад Саида гьазурна, «Мавел» издательствода «Багьа затI я ватан даим» тIвар алаз фияви ашукьдин сад лагьай ктаб акъуднава. Адаз сифте гафни Мурад Саида кхьенва.

Ктабдин кьетIенвал ам я хьи, Мурад Саида, урус чIалал кхьенвай сифте гафуна Дагъустанда ашукьрин искусство вилик финик пай кутур устадрин кIвалахдиз дуьзгуьн къимет гуналди, ашукь Ширинан ва адан хва Шемширан яратмишунрикай веревирдер ийизва. Мадни ктабда ашукьдин 50-далай виниз шиирар лезги ва урус чIаларал ганва. Чи шаирри ашукь Шемшираз бахшнавай шиирарни ава.

Ктаб кIелайла, малум жезва хьи, ашукьди фейи чкайра­ вичиз акур гуьзел тIебиатдикай, хуьрерикай, гьалтай­ ин­санри­ авур таъсирдикай, руьгьдиз къуват гузвай гьала­ри­кай кхьизва. «СтIал Сулейманаз», «Руьгьдин таъсир­ амукьда», «Дагъустандин дагъларикай», «Чан зи буба», «Ашукь Кьуьчхуьр Саидаз», «Фиярин хуьр», «Рагьимат Гьа­жие­ва­диз», «Дидедин ван» шиирра хайи чил, хуьр, баркал­лу, ла­йихлу инсанар кIан хьунин, абурал дамах авунин, тIебиатдин гуьзелвилер къвезмай несилар патал хуьнин фикирар ава.

«Чан зи буба» шиирда Шемшира ашукь Ширинан уьмуьрдин кар алай ва кьетIен вакъиайрин, ада халкьдиз къуллугъ авур тегьердин шикилар чIугунва.

ХьаначтIани сагьиб еке девлетрин,

Къачуз хьана чIехи гьуьрмет миллетрин.

ЦIар чIугуна дуьньядилай зегьметдин,

Чан зи буба ашукь Ширин фияви.

Вичин кеспиди ашукь датIана сиягьат­диз, мугьманвилиз тухузва. Фейи, акур чкайрин, лайихлу инсанрин таъсирдик кваз рикIяй баркалладин, гьейранвилин­ цIарарни акъатзава. «Фиярин хуьр», «Уху­лар», «Смугъулар»,  «Ахцегь гьамам»­,  «Чепер хуьр», «Къурушар», «Уфа шегьер­диз», «Докъузпара райондиз» шиирра ашукьди гьар са макандин лайихлувилер къалурзава, хайи чилин, инсанрин тарифзава, акьалтзавай несилдиз ватан кIан хьуниз, адаз намуслувилелди къуллугъ авуниз эверзава.

Ктабда ашукь Ширинан хизандин, Шемширан ва адан дустарихъ, музыкантрихъ, манидаррихъ галаз янавай шикиларни ганва.

Абад Азадов