Исрафилова Диана Абдусе­лимовна 1978-йисуз Дагъустандин­ Огни шегьерда дидедиз хьана. кIе­лунрал рикI алай руша 10-нумрадин мектебда 10-класс хъсан къиметралди акьалтIарна. Ам иллаки биологиядин тарсарал  ашукь хьанвай, абур гузвай муаллимни адаз багъри кас хьиз кIандай. Гьавиляй, мектеб акьалтIарайла, Диана Дагъустандин госуниверситетдин биология­дин факультетдиз гьахьун дуьшуьшдин кар тушир. Эхиримжи курсуна кIелзавай 1999-йисуз кьисметди ам Дербент шегьердиз акъуд­на. Ина кIвал-югъ кутуна, 17-нумрадин юкьван мектебда, биологиядин тарсар гуз, кIвалахал ­акъвазна. Са йисалай географиядин тарсарал элячIна. Ина ада саки 25 йисуз зегьмет чIугуна.

Диана Абдуселимовнади рикIел хкизвайвал, 21 йисан яшда аваз, диплом гвай­тIани, кIвалахдин рекьяй тежриба авачир. Са тIимил кьван кичIни кваз кIвалахал экъечI­навай ам мектебдин коллектив­ди­ па­ра хушдиз кьабулна. Директор Аминат Шагьмегьамедовадикай адаз халисан насигьатчи хьана. Же­гьил пешекардиз ада гафуналдини, тежрибадалдини куьмекни гана­, аялрихъ галаз хуш рафтар­вилин алакъаяр хуьдай насигьатарни.

Жегьил муаллим патал и бере яратмишунрихъ къекъвезвай тежриба къачудай вахт хьана. Мектебда кIвалахай йисара педагогвилин девлетлу тежриба кIватIна. Вичиз кIвалахда куьмек авур Аминат Алиевнадикай ам еке гьуьрметдалди рахана ва а вахтар чими гьиссералди рикIел хкана.

Классдин руководитель яз, Дианади пуд выпуск ахъайна. Муаллимди абурухъ галаз гилани алакъа хуьзва. Выпускникрини чпин муаллим рикIелай алуднавач, адаз суварар, хайи югъ мубаракзава. Мектебдиз атана, кьил чIугвазва.

2023-йисуз Д. Исрафиловади «Дагъустандин муаллим» конкурс­да иштиракна, пуд лагьай чка кьуна.

Аялриз тербия ва чирвилер гуз чIугур гьакъисагъ зегьметдай шегьердин образованидин управленидин ва мектебдин руководстводин патай ам са шумуд шабагьдиз ла­йихлу хьанва.

2023-йисуз, «Гележегдиз билет» проектдин сергьятра аваз, Дагъустан Респуб­ликадин образованидин тешкилатра кIелза­вайбурун арада профориентациядин кIва­лах вилик тухунин карда лайихлувилерай ва активнидаказ иштиракунай Диана Абдуселимовна РД-образованидин ва илимдин министерстводин гьуьрметдин грамотадиз лайихлу хьана.

Гьа и йисуз Диана Абдусе­ли­мовнадиз­ Дербент шегьерда кардик квай аялрин­ «Дельфин» бахчадин заведующийвиле кIва­лахун тек­лифзава.

Мектебдин муаллим аялрин бахчадин регьбервиле кIвалахиз рекье тунихъ себебар авачиз тушир: аялрал рикI, абурухъ галаз кIвалахиз кIан хьун, кIвалах тешкилиз алакьун, жемиятдин уьмуьрда иштирак авун, тапшурмишай гьи кар хьайитIани, са рехнени квачиз, гъил-гъиле аваз, кьилиз акъудун ва икI мад.

— Са хизан хьиз, дуствилелди санал кIвалахзавай коллективдай аялрин бахчадиз атайла, заз ина коллективдин арада авай алакъаяр гьич бегенмиш хьаначир, — къейдзава Диана Абдуселимовнади.

КIвалахдив эгечIай са куьруь вахтундилай ада коллектив кIватIна ва лагьана: «Сада-садаз яб гун, садаз-садан ван атун герек я».

Майдин вацра чун аялрин бахчада чIе­хи Гъалибвилин 80 йисан юбилейдиз талукьарнавай утренникдиз килигна. Тербиячийри аялар мярекатдиз гьазурнавайвал ва чпини ана активнидаказ иштиракзавайвал акурла, абур заведующийдин туьнбуьгьдин гъавурда дуьз акьунвайди аквазвай. Аялрин бахчадин 11 группада 300-лай гзаф аялар ава. Диде-бубаяр тербиячийрин кIва­лахдилай рази я. Соцсетда авай аялрин бахчадин чина абуру, тербиячийриз сагърай лугьуз, тарифрин гафар кхьизва.

Зегьметда зирекбурун арада аялризни жаванриз тербия гунин хиляй РФ-дин гьуьрметлу къуллугъчи Фарида Ражабова­,  РД-дин образованидин отличникар тир Лала Нагъиева, Индира Сафарова, тербия­чияр Олеся Эслиханова, Фарида Адилова ва масабур ава.

— Диана Абдуселимовна, обра­зованидин хиле алай аямдин регьбер муаллим, менеджер яни, та­хьайтIа, — гьаким? Аялрин бахчадин заведующий. Вуж я ам? – хабар кьуна за.

— Зи фикирдалди, заведующий­ образованидин хиле тешкилатчи­, тербиячи, муаллим ва новатор я. — ГьакIни администратор ва менеджер, кIвалахдин юлдаш ва къуллугъдалди таъминарзавайди. Гьуьжетрин месэлайрал гьалтайла, — дип­ломат ва психолог. Мадни — майи­шатчи, дизайнер…. КIва­лахдин йи­къан къене зак луварни акатда, яратмишдайдини жеда, гьахъ-гьисаб гудайдини…И вири крари заведующийдин кIвалах четинди ва итижлуди ийизва. За жуван аялрин бахчадални ина кIвалахзавай пешекаррин командадал дамахзава, — жаваб гана педагогди.

Чаз акурвал, Диана Абдуселимовнадивай аялрин бахчада, вичи 25 йисуз зегьмет чIугур мектебда авай хьтин, вижевай дуствилин чими алакъаяр арадал гъиз алакьнава.

Диана Абдуселимовнадини Тимур Исрафилова хизан кутуна. Тимура Дербент шегьердин электросетрин регьбердин заместитель яз кIвалахзава. Абурухъ пуд велед ава. ЧIехи гада Рустам стоматолог я. Сефижата медвузда педиатрвилин пешедай — 4-курс, Абдулмуъмина 9-класс акьалтIарнава.

Къагьриман Ибрагьимов