11-майдиз Мегьарамдхуьруьн аялрин «Теремок» бахчади важиблу сувар — 55 йис тамам хьун — шад гьалара къейдна.
РикIел хкин, «Магарамкентский» совхоздин бинедаллаз, яни карханадин рабочийрин аялар фикирда аваз ачухай «Теремок» бахчади, кьиле заведующий Галина Исаевна Шагьмарданова аваз, сифтегьан бицIекар кьабулун патал ракIарар 1970-йисан майдиз ачухнай. 1980-йисуз адан чкадал пединститут акьалтIарнавай жегьил пешекар Фироза Арасхановна Халидова хьана — ада 1992-йисал кьван идарадиз регьбервал гана. Идалай кьулухъ ва къенин йикъалди «Теремокдин» заведующийдин везифаяр Хадижат Арасхановна Шагьмардановади тамамарзава.
Инал къейд ийин хьи, «Теремок» бахча Мегьарамдхуьруьн районда виридалайни хъсанбурукай сад яз гьисабзава. Ада райондин «Йисан тербиячи», «Зи виридалайни хъсан аялрин бахча» конкурсра мукьвал-мукьвал пишкешрин чкаяр кьазва. Бахчада тербияламишзавай аялри районда кьиле тухузвай мярекатра чпин гьунарар къалурзава.
Анжах эхиримжи йисарин агалкьунрикай рахайтIа, 2020-2021-йисарин вахтунда кьиле тухвай вири патарихъай ахтармишунрин нетижада «Аялрин бахча «Теремок» Вирироссиядин образованидин тешкилатрин «Ватандин образованидин дамах» килигунин-конкурсдин лауреат-гъалибчи хьана. ГьакIни «Теремокдихъ» «Эколята-Дошколята», «Аялриз хатасуз рекьер», «Салам, салам, мах», «Проектрин кIвалахрин виридалайни хъсан разработка» конкурсра са шумуд сеферда гъалиб хьайивилин дипломар, шабагьар ава. Вирироссиядин яратмишунрин кIвалахрин «Гатфар атана — Гъалибвилин гатфар», «Зи Россиядин игитар», «Шикилра тарих», «Майдин аскерар, эбеди баркалла квез!» ва са жерге маса конкурсра иштиракунин хъсан нетижаярни къейд ийиз жеда.
Амма «Теремокдин» тарихда муракаб вахтарни хьанай. ИкI, 1992-йисуз «Мегьарамдхуьруьн» совхоздин аялрин бахча, майишатдин экономикада арадал атанвай четин гьалар себеб яз, агалнай ва гьа йисан декабрдиз ам райондин халкьдин образованидин управленидин бинедал алуднай.
Гьа и дегишвилер гьатнавай муракаб вахтунда аялрин бахчадин регьбервилин везифаяр, хизандин себебар аваз, Ставрополдин крайдай хайи хуьруьз хтанвай ва комсомолдин райкомда, гьакIни юкьван мектебда муаллимвиле завучвиле кIвалахунин тежриба авай Хадижат Шагьмардановадин хиве туна. Лагьана кIанда хьи, адалай вичин патав савадлу, жавабдар ва хкянавай пешедал рикI алай ксар кIватIиз алакьна.
Абурун жергедай яз, муаллимар тир Метгьадова Жарият Ферзиллаевнадин, Рагьимханов Адильхан Агъахановичан, Метгьадова Латифа Девлетхановнадин тIварар кьаз жеда. (Аллагьдин рагьмет хьурай чпиз). Хъсан пешекаррикай-педагогрикай яз, гьакI Исакьова Ирина Гьуьсейновна, Халидова Фироза Арасхановна, Оружева Эльмира Кезимовна, Магьмудова Лейли Магьмудовна, Фергьатова Аминат Тагьировна, Къазиагьмедова Жемиля Гьажиевна, Женетова Шагьнигер Няметовна,Тагьирова Назифат Наметовна, Шихалиева Жасмина Тегьмезовна, Ашуралиев Мирзе Мурадович, Абдулмежидов Идрис Славович къейд ийиз кIанзава.
Гьелбетда, аялрин бахчадин кIвалах технический къуллугъчиярни галачиз фикирдиз гъиз хьун мумкин туш. И жигьетдай Къурбанова Ханхалум Саидагьмедовадин (Аллагьди рагьметрай вичиз), гьакIни Селимова Гуьльжагьан Искендеровнадин, Дадашева Бесхалум Тагьировнадин, Къазиагьмедова Саимат Асретовнадин, Халидов Сиражидин Тагьировичан, Алискеров Назир Жигерхановичан зегьмет къейд ийиз кIанзава.
Къенин юкъуз «Аялрин бахча «Теремок» МКДОУ-да жуьреба-жуьре яшарин аярин 4 десте кардик ква. Санлай къачурла, ина 1,5 йисалай 7 йисал кьван яшда авай 76 аял тербияламишзава. «Теремок» аялар вири патарихъай виликди тухузвай ва абур мектебдиз гьазурзавай идарадин дережадинди я. Коллективда хуш гьалар, хъсан шартIар, дуствилин сигъ алакъаяр арадал атанва. КIвалахдив яратмишунардай тегьерда эгечIзава. «Чун са хизандиз элкъвенва лагьайтIа жеда», — разивилелди къейдзава Х.Шагьмардановади.
Алай вахтунда бахчада 10 муаллимди кIвалахзава. Абурукай 4-дахъ — виниз тир дережадин пешекарвал, 3 муаллимдиз «РД-дин образованидин отличник» лагьай лишанар ава, 3 муаллим «РФ-дин умуми образованидин гьуьрметлу работник» тIварцIин сагьибар я.
«Къенин йикъалди фенвай рекьиз вил вегьейла, чавай инанмишвилелди лугьуз жеда хьи, аялрин бахчадин зур асирдилай гзаф тир девир аялар тербияламишунин карда са шумуд несилдин муаллимри чIугунвай гьар йикъан гьакъисагъ зегьметдин тарих я. Чун вахтунихъ галаз сад хьиз физва. Аялриз къугъваз, дуствилин алакъаяр тайинариз, хъсан-пис чириз, дуьзгуьн инсанар тербияламишзава, чIехи ийизва. КIвалахда чна алай аямдин технологияр ишлемишзава, бицIериз цIийи-цIийи алакьунар ва чирвилер гузва», — лугьузва Хадижат Арасхановнади.
Саида Мурадова
