Уьлкведин Президент В. Путинан тапшуругъдалди алай вахтунда бюджетдин къуллугъчияр патал зегьметдин гьакъи гунин цIийи къайда (НСОТ) арадал гъунин къайгъуйрик ква. 2026-йисуз НСОТ ахтармишун патал уьлкведин са шумуд регионда къуватда гьатда. 2027-йисалай лагьайтIа, мажиб виринра цIийи къайдада гуда.
Здравоохраненидин хилен къуллугъчийрин зегьметдин гьакъи хкажунин, уьлкведин регионра и хиле зегьмет чIугвазвай ксарин мажибдин кьадарда еке тафават хьунихъ, идахъ галаз алакъалу тир «миграциядин» ва маса месэлаяр алатай саласадиз «Дагестанская правда» газетдин редакцияда, РФ-дин, гьакIни региондин здравоохраненидин министерстводин ва профсоюздин векилрин иштираквални аваз, кьиле фейи пресс-конференциядал веревирдна.
Кьилди къачуртIа, и мярекатда авай: РФ-дин здравоохраненидин къуллугъчийрин профсоюздин председатель Анатолий Домников, адан заместитель Михаил Андрочников, РФ-дин здравоохраненидин къуллугъчийрин профсоюздин экономика вилик тухунин рекьяй управленидин начальник Светлана Новикова, алакъайрин управленидин — Ольга Жанкевич, Краснодардин крайдин здравоохраненидин къуллугъчийрин профсоюздин председателдин заместитель Лариса Дьяченко, Ставрополдин крайдин — Александр Кривко, Дагъустандин — Зумруд Бучаева, РД-дин здравоохраненидин министрдин заместитель Аздар Мирзоев.
И юкъуз Махачкъалада, винидихъ галай спикеррин иштираквал аваз, уьлкведин Кьиблепатан ва Кеферпатан Кавказдин федеральный округрин яшайишдин месэлайра амадагвал авуниз ва зегьметдин гьакъидин кьадар къайдада туниз талукьарнавай семинар-совещанини кьиле тухвана. Кьилди къачуртIа, ана здравоохраненидин хилен кадрийрин сиясатдин, мажибдин, инфраструктурадин, гьа гьисабдай яз медицинадин идараяр эцигунин, абур ремонтунин ва са жерге маса месэлаяр веревирдна.
Мугьманри пресс-конференциядал къейд авурвал, здравоохраненидин хилен къуллугъчийрин мажиб хкажунин месэлайрал машгъул яз саки 15 йис я. Уьлкведин вилик жуьреба-жуьре рекьерай важиблу маса месэлаяр (коронавирусдин тIугъвал, Украинада дяведин махсус серенжем) расалмиш хьуни и кар кьулухъ яна.
— Медицинадин къуллугъчийриз хъсан мажиб гун — им и хилез бажарагълу кадрияр желбдай виридалайни кьилин рехъ я. Гьа са вахтунда, месэладал кIукI гъун патал кьил акъудна кIани гзаф крар ава. Мажиб цIийи къайдада гун, ам хкажун патал уьлкведа сад тир къайдаяр арадал гъунин, умуми «модель» туькIуьрунин къайгъуйрив жавабдарвилелди эгечIун истемишзава. ГьикI хьи, им кадрийрин сиясатдин стратегия я, — къейдна А. Домникова.
Спикерри здравоохраненидин министерстводи ва профсоюзди уьлкведин Президентдин тапшуругъ кьилиз акъудун патал саналди зегьмет чIугвадайди къейдна. Чкайрал кьиле тухузвай семинаррин-совещанийрин, пресс-конференцийрин (икьван чIавалди абур федеральный маса округра кьиле тухвана) кIвалахдин нетижада, чкайрилай гузвай теклифрихъни яб акалуналди, тамам ва дуьз механизм арадал гъиз алакьдайдахъ умудлувал къалурна.
Рагнеда Рамалданова
