Лезгийрин милли медениятдин федеральный дережадин автономия (ФЛНКА) «Лезги мектеб» проект кьилиз акъудиз эгечIнава. Адан сергьятра аваз, Кьиблепатан Дагъустандин мектебра гатун вахтунда лезги чIал чирдай махсус кружокар кардик кутунва.
Асул гьисабдай, ихтилат физвай кружокар жуьреба-жуьре шегьеррай вахтуналди хуьрериз хквезвай аялар патал тешкилнава. Якъин я, хайи ерийривай яргъа яшамиш жезвай абуруз хайи чIал, халкьдин тарих, адетар чирдай шартIар авач. И кружокри абуруз и карда куьмекда.
ФЛНКА-дин телеграм-каналди хабар гузвайвал, алай вахтунда Ахцегь, Дербент, Кьурагь, Мегьарамдхуьруьн ва СтIал Сулейманан районрин мектебра кружокрин кIвалахдив гатIуннава. Мукьвара Докъузпара ва Хив районрин мектебрани кардик кутадайвал я. Аялриз дидед чIалай чирвилер чкадин мектебра кIвалахзавай муаллимри гузва.
Къейд ийин хьи, сифте яз ихьтин кружокар арадал гъунин теклиф гайиди ФЛНКА-дин президент Васиф Гьасанов я.
«Лезги газет»
