Ахцегь райондин цIийи спорткомплексда, азаддаказ кьуршахар кьунай Дагъустанда СССР-дин спортдин сад лагьай мастер Гъаниев Абдулали Мегьамедвелиевич рикIел хуьнин лишан яз, 2010-2011- йисара дидедиз хьанвай жаванрин арада азаддаказ кьуршахар кьунай республикадин кIвенкIвечивал патал турнир кьиле фена.
Разивилелди лугьун хьи, вичин вахтунда хъсан адетдиз элкъвенваз хьайи и кесерлу акъажунар, райондин кьил Абдул-Керим Палчаеван къарардалди ва ада финансрин рекьяй куьмек гуналди, гила, 15 йисалай, муниципалитетда кьиле тухуз эгечI хъувунва.
Турнирда заланвилин гьар жуьре категорийрай Махачкъала, Избербаш, Хасавюрт шегьеррай, Мегьарамдхуьруьн, ЦIумада, Къаякент, Докъузпара, Рутул, Къарабудахкент, ЦIунти, БотIлих, Леваши ва Новолак районрай тир жегьил пагьливанри иштиракна.
КIвенкIвечи чкаяр кьурбуру РД-дин образованидин ва илимдин министерстводин патай кубокар, медалар ва талукь тир дережадин гьуьрметдин грамотаяр, гьакIни Палчаеврин хизандин патай пулдин пишкешар къачуна. Акъажунар неинки спортдин сувариз, гьакI Ахцегь райондин культурадин уьмуьрда важиблу вакъиадиз элкъвена. Ида районда спортдин азаддаказ кьуршахар кьунин жуьре гележегдани вилик финиз ва райондин итижар лайихлудаказ хуьз алакьдай спортсменрин цIийи несилар тербияламишуниз хъсан таъсирда.
Нетижайрикай рахайтIа, Ахцегь райондай — Кисриев Абдуселим (2-чка, 85 кг, тренер — Садыхов Фейруз) ва Гьажиев Тимур (3- чка, 57 кг, тренер — Гъаниев Феряд); Докъузпара райондай — Саидов Ризван (3-чка, 44 кг, тренер — Ж. Шихов); Мегьарамдхуьруьн райондай — Магьмудов Махач (3-чка, 68 кг), Муртузалиев Алик (3-чка, 48 кг, тренер — Р. Гьасанбегов); Рутул райондай — Дамуров Шамил (1-чка, 41 кг), Мурсалов Алибег (3-чка, 38 кг) ва Саидов Агьмед (3-чка, 48 кг, тренер — Х. Гьасанбабаев) кIвенкIвечи чкайриз лайихлу хьана.
Дашдемир Шерифалиев
