И йикъара Докъузпара райондин Миграгъа путарин спортдай республикадин 5-фестиваль кьиле фена. Идакай чаз райадминистрациядин пресс-къуллугъди хабар гана. Руьгьдинни бедендин лигимвал ахтармишдай хъсан майдан кIватI хьанвайбур патал халис сувариз элкъвена. Макьсад путарин спорт машгьурун, агьалияр сагълам уьмуьр кьиле тухунал желб авун ва дуствилин алакъаяр мягькемарун тир спортдин и серенжемдиз талукьарнавай шад мярекат ачухдайла, Докъузпара райондин кьилин заместитель Акиф Балакишиева районда, спорт вилик тухунал гьалтайла, хъсан адетдиз элкъвенвай спортдин и серенжемдин метлеблувал, важиблувал къейдна, адан иштиракчийрихъ агалкьунар хьун алхишна.
Дагъустандин физический культурадинни спортдин министерстводи ва «Вирироссиядин путарин спорт» общественный тешкилатдин региондин отделениди (РД-дин путарин спортдин федерациядин президент — Магелан Саидов) тешкилзавай и фестиваль райадминистрациядин куьмекни галаз кьиле тухузва. Шаксуз, ида чкадин гьукумди районда спорт вилик тухуниз ва агьалияр спортдал жезмай кьван желб авуниз артух фикир гузвайди къалурзава. Акъажунар Дагъустандин путарин спортдин федерацияди тестикьарнавай къайдайралди кьиле тухвана.
Къейд авун лазим я хьи, къизгъиндаказ ва итижлудаказ кьиле фейи спортдин серенжемда кIвенкIвечи чкаяр кьурбуруз талукь дережайрин медалар, дипломар ва пишкешар гана. Докъузпара райондин администрациядин патай тафаватлу хьайи спортсменар пулдин кьилдин пишкешар гуналди къейдна.
Рагнеда Рамалданова
