Махачкъалада кунг-фудай Россиядин ачух Кубок патал акъажунар кьиле фена. Россиядин лайихлу тренер, кунг-фудай Россиядин федерациядин президент Мегьамедкамил Рабаданован призар патал акъажунра чи уьлкведилай гъейри, Китайдин, Пакистандин, Азербайжандин, Къазахстандин, Эрменистандин спортсменри иштиракна. Къейд ийин, маса уьлквейрайни атанвай спортсменри иштиракай ихьтин акъажунар Дагъустанда сифте яз кьиле физва.
Спортдин и мярекатдин призрин фонд зур миллион манат тир. Кунг-фудай республикадин хкягъай командадин кьилин тренер Мурад Агьмадова къейдзавайвал, акъажунар вини дережада аваз кьиле фена ва абур Дагъустанда кьиле тухун адетдиз элкъуьн мумкин я. Адан гафарай, акъажунра виридалайни хъсан нетижа Россиядин дестеди къалурна. Аник квай Дагъустандин “Возрождение” спортклубдин ругуд тербиячи тафаватлу хьана.
Гьазурайди — Дагъви Шериф
