И йикъара Сулейман-Стальский райондин кьил Нариман Абдулмуталибова Уллугъетягъ хуьруьн кьил Гьабиб Гьуьсенбеговав Вини Хъартасрин хуьруьн цин месэла гьялун патал са карчиди ахъайнавай пулдин такьатар (300 агъзур манат) вахкана. И гьакъиндай «Лезги газетдиз» райондин администрациядин пресс-къуллугъди хабар гузва.
Тlвар малумарнавачир карчи, райондин кьилин гафарай, райондин Гуьне патан агьали я, амма вич масана яшамиш жезва.
Къейд ийин, Вини Хъартасрин хуьр «Уллугъетягъ» хуьруьн советдик акатзава. Алай вахтунда и хуьре 73 майишат ава ва 257 инсан яшамиш жезва.
Хуьре авай саки вири булахар кьуранва. Гьавиляй эхиримжи вахтара хуьруьн агьалияр хъвадай цин патахъай дарда гьатнавай. Гила месэла тамамвилелди гьялдайвал я. Нариман Абдулмуталибова вичин тlвар малумарна кlан тийизвай касдиз мергьяматлу кардай чухсагъул малумарна.
«Лезги газет»
