Мукьвара Интернетдай шад жедай хабар акуна — “Ахцагь” ЛФЛ-дин 2-лигада къугъвада. Виликрай чна хабар гайивал, пулдин такьатар бес тахьуникди Ахцегь райондин командадихъ са жерге турнирра, акъажунра иштиракдай мумкинвал авачиз гзаф йисар я. И сеферда кьисметди гьикI хьана гъанатIа, виликрай вич гьа и командадик кваз къугъвай, къе Брянск шегьердин “Спутникда” гьужумчи тир Мегьамед Алишева Инстраграмда вичин чина кхьенва: “Къугъвадай хъсан майдан, футболистар аватIани, эхимрижи саки вад йисан вахтунда зи хайи Ахцегь райондин “Ахцагь” ФК республикадин турнирра къугъвадай мумкинвал авачиз амай. Эхиримжи сеферда анин кьилин тренердихъ галаз суьгьбетдин вахтунда за команда республикадин чемпионатдин иштиракчи ийида лагьана хиве кьунай. Къе, 16-августдиз, чна футболдай Кавказда тIвар-ван авай турниррикай сад тир ЛФЛ-дин вири шартIар кьилиз акъуднава, гила “Ахцагь” анин 2-лигадин иштиракчи хьанва».
Мегьамед Алишева “Ахцагь” командадикай, адан мумкинвилерикай ва вичин мурадрикайни куьруь гаф лагьанва: “Райондин командадин жергейрай экъечIайдалай кьулухъ зун адан месэлайривай садрани яргъаз хьайиди туш. Гьамиша куьмекар гузвай ва командадихъ галаз санал алай. За Дагъустандин футболда авай четинвилер аннамишзава ва дагъдин хуьрера яшамиш жезвай жегьилри адаз ийизвай итиждин гъавурда зун ава. Дагъустандин ЛФЛ-дин 2-лигада къугъун жегьилар патал са агалкьун я…”
— “Ахцагь” ФК анжах чкадин агьалийрикай ибарат жеда. Турнир башламишдалди вилик гьар садавай, вичин алакьунар къалурна, командадиз гьахьиз жеда. Командадиз регьбервал Гьажиев Камил Билаловича гуда. Турнирдин вири матчар Дагъустандин меркезда кьиле фида. Ам сентябрдин вацралай 2019-йисан апрелдалди давам жеда. Вири и вахтунда футболистар къвез-хъфидай улакьралди ва тIуьнралди таъминарда, — алава хъийизва Мегьамеда.
Командадихъ рикI кузвай футболистди и агалкьун “Ахцагь” ФК-диз мубаракна, алакьунар авай Тимур Агьмадоваз, Артем Мирзоеваз, Арсен Арсланбековаз сагърай лагьана.
Къейд ийин, и лигадин вири къугъунриз гьар са касдивай “Ютуб” хостингда авай Дагъустандин ЛФЛ-дин 2-лигадин официальный чинай килигдай мумкинвал ава. Ана футболистрин шикилар, хъсан спортсменриз сесер гунар жеда.
Гьазурайди — Дагъви Шериф
