Майдин суварин вилик Кьасумхуьрел алай СтIал Сулейманан райондин Медениятдин кIвале халкьдин ва лезги композиторри кхьенвай манияр лугьунай Кьиблепатан Дагъустандин мектебра кIелзавай аялрин арада меценатар тир Шайдаев Зураб Турабовичан ва Загьрабегов Эдуард Захаровичан теклифдалди райондин администрацияди, образованидин управлениди къуьн кутуна, конкурс тешкилнавай.
РикIел хкин, алатай йисуз Зураб Шайдаеван харжийрихъ чIехи яшара авай манидаррин арада халкьдин манияр лугьунай тухвай «Пенкер баха» конкурс виридан рикIел аламукьдайди хьана. Анал аялрин арадани халкьдин манияр тамамарунай конкурс тухунин теклифар ганай. Меценатди гьанал гайи гаф алай йисуз, гъил-гъиле аваз, кьилиз акъудна.
Конкурсда иштиракдай арзаяр Кьиблепатан Дагъустандин 38 мектебдай атанвай. Конкурсдин комиссиядиз абуру ракъурай манийрин роликриз дикъетдивди килигайдалай гуьгъуьниз жюридин кIватIалди гьар са иштиракчидиз къимет гана, халкьдин манияр лугьудай номинациядай 12 ва гьакьван лезги композиторри кхьенвай манияр лугьудайбур финалдиз хкяна.
Пуд сятда давам хьайи мярекатда саки вири лезги районрай атанвай манияр лугьудай гъвечIи ва жаван артистар авай.
Пешекаррикай хкянавай жюриди къимет гунин нетижада «Халкьдин мани» номинациядай Мегьарамдхуьруьн искусствойрин мектебдин ученица Эмилия Саидовади — 1, Ахцегьрин музыкадин мектебдин ученица Назлу Рзахановади — 2 ва Мегьарамдхуьруьн искусствойрин мектебдин ученик Анри Залова 3-чкаяр кьуна. «Лезги композитордин мани» номинациядай Ахцегьрин музыкадин мектебдин ученица Къизилгуьл Шугъаевади — 1, ДаркIушрин юкьван мектебдин ученик Имам Фейзуллаева — 2, Кьурагьрин 1-нумрадин юкьван мектебдин ученица Анжела Рустамовади 3-чкаяр кьуна.
Приздин чкайриз лайихлу хьаначтIани, гъвечIибур яз, мани лугьунин гъавурда авай, манидин манадиз гьахьна, чпин нумраяр хъсандиз тамамарай Кьулан СтIалрин мектебдин ученица Зенфира Пирисмаиловадин, Кьасумхуьруьн яратмишунрин кIвалин ученикар Насиб Мегьамедован, Жамал Агъабегован, ЦIийихуьруьн мектебдин ученица Фатима Малабаевадин ва Ахцегьрин музмектебдин ученица Ирина Агъарагьимовадин алакьунар къейд ийиз кIанзава.
Гьар номинациядай сад лагьай чка кьурбуруз — 20 агъзур манат, кьвед лагьай чка кьурбуруз — 15 агъзур манат ва пуд лагьай чка кьурбуруз -10 агъзур манат, приздин чка кьун тавур гьар са иштиракчидиз кьве-кьве агъзур манатни дипломар гана.
Къагьриман Ибрагьимов
