Баркалла?!
(Ажайиб инсанар — ажайиб кьисметар)
Каспийск шегьердин мехъеррин гегьенш зал. Хуьруьнвидин авай са веледдин гурлу межлис кьиле физвай. Садлагьана залдин юкьвал Мега (ученикдиз хайи йикъарилай гайи тIвар) экъечIна ва ада малумарна: «Исятда межлисдин майдандал гьуьрметлу Гьабиб муаллим ва и залда авай адан ученикар экъечIда. Кьавалар, буюр «Ша, Эмирбег!» макьам ягъа. Фаризат вах, буюр, — гьа манини тамамара!»
Са шумуд кас рушари ва гадайри, Гьабиб муаллим гьалкъада туна, шаддаказ кьуьлзава. Залди, кIвачел къарагъна, гурлу капар язава. Зи вилерай лагьайтIа, марф хьана, накъвар авахьзава…
Накъвар авахьдачни бес! Къе зун икI къаршиламишзавай, шаддаказ рикIел хканвай и аялри 30-35 йис идалай вилик сифтегьан классра кIелзавайди тир. А чIавуз гьабуруни зи играми дуст Масана зун жаллатIри рекьизвай чкадал къутармишнай.
Зал гьужум авур кьилин жаллатI, Масана кьамалай кьуна, адан пелез а жуьреда гъуд сухнай хьи, татаб хьайи жаллатI за къерехдал гадарна. Ада, тепилмиш хьана, вири къуватдалди кьуьл эцягъай зун чилел ярх жезвай вахтунда за, капаш чилиз яна, жув ярх хьуникай хвенай. И кар акур жаллатIдин кайваниди Масанан гъилел акьван пис ажугъдивди кьуьл гьалчнай хьи, белки, касдин гъил къенин юкъузни тIазма жеди…
Са ни ятIани тади гьалда милициядиз ва прокурордиз, Нуратан хуьруьн школадин директор жаллатIри тукIвазва лагьана, хабар гана. Са сятни алат тавунмаз, пайда хьайи милициядин векилри санлай вад кас жаллатIар кьуна хутахна. Заз лагьайтIа, ягъай чкаяр пис тIазвайвиляй йифен ахварни амачир. Пакадин юкъуз милициядин машинди анин идарадиз тухвай, зи кIвачерик ярх хьанвай кьилин жаллатIди, вичин пелни, гъутув яна, ивиламиш хьанва лугьуз, завай багъишламишун тIалабна. Хъел акатай начальникди лагьана: «Къурумсах, гила вун геж хьанва. Жуван чкадал ахцукь!»
Ада духтурди кхьенвай чар кIелна, зун больницадиз ракъурна. За начальникдиз лагьана хьи, за гьеле я ваз, я прокурордиз са арзани авунвач. Духтурри вуч лугьудатIа килигда, къуй и жаллатIрив чпин жаза ахпа агакьрай.
Амма зи намусди и жаллатIар маса гун кьабулначир. Кьилин духтур Вагьидаз за лагьана хьи, вуна зи гьалдин патахъай справка гана, зун республикадин больницадиз ракъура. Духтурди вичини гьакI фикирзава лагьана. Анжах ада гайи справкани къачуна, зун милициядин начальникдин патав хтана. Справка къалурайла, ада вичи лазим жаза гудайди малумарна. За адаз, прокурордизни хабар гана, зун хуьруьз рахкурун минетна. Заз мад а залум ксарин сифетар ахкун тавурай…
Прокурорди лагьайтIа, зун жаллатIар хуьзвай коммунист я лагьана, залай партиядин райкомдиз чар ракъурна. Са гьафтедилай заз райкомдин бюродал эверна ва анал зи месэладиз килигна. За жуван патай лагьана хьи, жаллатIриз зун рекьизни кIан хьана, гила бюродал заз туьнбуьгьни ийизва.
Яшлу коммунист, вири девирра бюродин член яз хьайи Амрагь Демирова гаф къачуна. Ада лагьана: «За фикирзавайвал, Гьабиб муаллимди баркалла къведай кар авунва. Ада вичиз хьанвай дердисервилиз, такIанвилиз дурум гана вичин, хуьруьн тIвар, райондин, гьакI республикадин тIварни пакдиз хвена. Баркалла, чан хва!»
За инал кхьенвай цIарар кIелдай кас хьайитIа, жаллатIрилай гъил къачуна, за гьакъикъатдани баркаллу кар авунани?!
А йикъарилай инихъ саки 60 йис алатнаватIани, зун къенин юкъузни шаклу яз ама. И кардин себебни ам я хьи, саки кьве варзни алат тавунмаз инсафсуз жаллатIди маса тахсиркарвал авуна. Идан гьакъиндай анжах маса сеферда…
