СтIал Сулейманан райондин кьил Саид Темирханова далу патан лайихлу зегьметчи Балахалум Абасовадиз 100 йисан юбилей шад гьалара тебрикна. Идакай чаз райадминистрациядин пресс-къуллугъди хабар гана. И югъ неинки са Абасоврин хизан, гьакI вири районэгьлияр патални сувариз элкъвена, гьикI хьи, Балахалум Агьмедовна хьтин ксари чи халкьдин руьгьдин къуват, мягькемвал къалурзава.
Дагъустандин Кьил Сергей Меликован тIварунихъай райондин регьберди адав Гьуьрметдин I дережадин орден — зегьметда лайихлувилерай ва чи общество вилик тухуник пай кутунай виридалайни кьилин шабагь — вахкана. Адан лайихлувилер къейд авун дуьшуьшдин кар туш. Балахалум Агьмедовнади гзаф четинвилериз дурум гайи уьмуьрдин камаллу ва баркаллу рехъ атIана, багърийрин къайгъударвал чIугуна.
«Чи обществода ихьтин акьалтIай хъсан дишегьлияр хьунал чна дамахзава. Балахалум Агьмедовнадиз чIугур зегьметдай ва вафалувиляй вири республикадин тIварунихъай сагърай лугьудай мумкинвал хьунал зун рикIивай шад я. Адахъ мягькем сагъламвал ва уьмуьрдин яргъал йисар хьун алхишзава. Къуй адан уьмуьрдин рекьи гележегдин несилар ватандиз къуллугъ авунал ва хизандин ивиррин къиметлувал хуьнал руьгьламишун давамаррай!» — алхишна Саид Темирханова.
Балахалум Агьмедовна неинки зегьметдин ветеран, гьакI къе уьлкве вилик тухуник гьар сада вичин еке пай кутазвай 8 велед чIехи авунвай Игит дидени я. Адан хизандин чешнеди муьгьуьббатди, гьуьрметди ва зегьметди гьихьтин агалкьунрал ва дуьзгуьнвилел гъизватIа хъсандиз къалурзава.
Абасоврин хизандин ватандашвилин активный позиция, райондин кьили къейд авурвал, еке дикъет гуниз лайихлу я. Чпин хайи макандин халис ватанпересар яз, абурувай инсанар къени краралди сад ийиз, агудиз алакьзава. Хизанди чпин хайи хуьруьз куьмекар гузва ва район вилик тухуник лайихлу пай кутазва. Абурун меценатвилин крари уьмуьрдин са шумуд хел кьунва. Эхиримжи вахтунда Абасоврин хизанди ватан хуьзвайбуруз куьмекар гун гьикьван важиблу кар ятIа къалурзава. Мугьман хьайи чIавуз Саид Темирханова абурув аскервилин са частунин командирдин Чухсагъулдин чар вахкана. ИкI, Мамед Абасован тIварцIихъ кхьенвай чарче дяведин махсус серенжемдин иштиракчийриз абурун хизанди гузвай куьмекдай рикIин сидкьидай сагърай лагьанвай.
Регина Семедова
