12-майдиз РД-дин милли сиясатдин ва диндин крарин рекьяй министерствода, ЧIехи Гъа­либвилин 80 йис тамам хьуниз талукьарна, «Дагъустан — Россия — Сербия: алатай девирдай геле­жегдиз муькъвер» лишандик кваз элкъвей стол кьиле фена­. Адан кIвалахда Дагъустандин милли сиясатдин ва диндин кра­рин рекьяй министр­дин сад лагьай заместитель Арсен Магьмудова, Махачкъалада Россиядин МИД-дин Векилдин везифаяр тамамарзавай Арсен Ярагьмедова, Къизляр райондин администрациядин отделдин начальник, СВО-дин иштиракчи Айгум Ногъаева, Россиядин дявединни тарихдин обществодин ДРО-дин член Агьмедия Магьадова, генерал Божидара Деличан тIварунихъ галай «Ни шагу назад, за нами­ Сербия» фондунин директор Светлана Дели­ча, Вирироссия­дин ветеранрин­ «Женгинин стхавал» общественный тешки­лат­дин Сербияда авай векил Ольга Литвинади, диндин ва общественный тешкилатрин векилри ва масабуру иштиракна.

Видеоалакъадикай менфят къа­чуналди, элкъвей столдин кIва­лахдик Сербиядай уьлкведин­ армиядин отставкада авай контр-ад­мирал Антич Бошко, Вирирос­сиядин ветеранрин «Женгинин стхавал» общественный тешкилатдин председателдин заместитель Геннадий Шороховни экечIна.

Мярекат, Гъалибвилин югъ теб­рик авуналди, А. Магьмудова ачухна. Алатай  йисан ноябрдиз Сербиядин Бездан поселокда да­гъус­танвидиз — Советрин Союздин Игит, лейтенант, 1944-йисан ноябр­диз ­­­Югославияда игитвилелди телеф хьайи Зульпукар Абдурагьмановаз — памятник ачухайди къейд авунихъ галаз сад хьиз, ада тарихдин чинар рикIел хуьнай Сербиядай тир дустариз сагърай лагьана. Гъалибвилин 80 йис тамам хьун чи виридан умуми сувар тирди, Совет­рин Армияди Югославиядин халкь азад авунин армиядин подразделенийрихъ галаз санал­ кьиле тухвай Белграддин гьужум Дуьньядин  кьвед лагьай дяве акьалтIзавай ма­къаладин важиблу вакъиайрикай сад хьайиди рикIел хкана.

Чи уьлквейрин арада авай дип­ломатвилин ва стхавилин ала­къай­рал Арсен Ярагьмедов, Свет­ла­на Делич, Агьмедия Магьадов ва масабур кьетIендаказ акъвазна­. Россия ва Сербия стха халкьар тир­ди, Сербиядин партизанрини Да­гъустандин аскерри санал женг чIу­гуналди, неинки хайи чилер, гьакI вири алем душмандикай хвейи­ди­, халис дуствал четин вахтунда мадни мягькем жедайди, Сербияди и дуствал, Россиядиз вафалувал датIана тестикьарзавайди къейдна.

Элкъвей столдин сергьят­ра аваз, адан спикерри Дагъустан­дини Сербияди гележегда сада-са­дахъ галаз алакъа аваз кIвала­хунин месэлаяр веревирдна. А. Магьмудова элкъвей столдин иштиракчийриз, гьа гьисабдай яз Сербиядай атанвай мугьманриз сагърай лагьана, къведай йисузни  гуьруьшмиш хьунин умудлувал къалурна.

Чи мухбир