12-майдиз РД-дин Кьил Сергей Меликова нубатдин сеферда жуьреба-жуьре месэлайрай дагъустанвияр кьабулна, абурун дердийрихъ яб акална. Малум тирвал, ихьтин серенжемар Россиядин Президентдин тапшуругъдалди регионра вахт-вахтунда кьиле физва.
Асул гьисабдай агьалийрик яшайишдинни коммунальный майишатдихъ галаз алакъалу месэлайри къалабулух кутазва. Мисал яз, Махачкъаладай тир Светлана Чувстинади ва Замира Мегьамедалиевади региондин Кьиливай Эмирован куьчеда авай гзаф мертебайрикай ибарат 19-нумрадин кIвалин винел патан акунар ремонт авунин карда куьмек гун тIалабна.
И месэладай региондин Кьилиз Махачкъаладин мэр Юсуп Умавова, эцигунрин, архитектурадин ва ЖКХ-дин министр Бахтияр Уллаева, республикадин госжилинспекциядин регьбер Сергей Касьянова баянар гана. С. Меликов гьялна кIанзавай месэладин материалрихъ галаз таниш хьана ва идалай вилик а кIвалин агьалийрин тIалабуналди гьукумдин органри кьилиз акъуднавай кIвалах вучиз наразивалзавайди ятIа, гьа кар ахтармишунин тапшуругъ гана.
Сергей Меликова Южно-Сухокумскдин Комарован куьчеда авай куьгьне кIваляй агьалияр куьчарунин месэладизни фикир гана. Алай вахтунда 15 хизан яшамиш жезвай общежитие 2017-йисуз чIуру гьалда авайди ва чукIурна кIанзавайди яз гьисабнай. Эцигунрин министерстводин кьили къейд авурвал, программадин бинедаллаз мукьвал йисара агьалияр цIийи кIвализ куьчардайвал я. Республикадин регьберди и кар фад-фад авун, агьалийрин кIвалин месэла куьруь муддатда гьялун теклифна, гьа жергедай яз мумкин тир инвесторар желб авуналдини.
Газдалди таъминарунин месэладин патахъай Къизляр райондин Виноградное хуьруьн агьалийрин патахъай Саида Уцулиева атанвай. И хуьре 50-далай гзаф кIвалер ава. Сергей Меликова региондин минэнергодал «Газпроммежрегионгаз» тешкилатдихъ галаз санал газдалди таъминарунин месэлаяр гьялунив эгечIун тапшурмишна.
С. Салимов
