Гьалар раижна

Дагъустанда гатфарин тумар саки 100 агъзур гектарда цанва. Идакай, РД-дин хуьруьн майишатдин ва недай суьрсетдин министрдин сад лагьай заместитель Шарип Шарипован гафарал асаслу яз, ведомстводин сайтда кхьизва.

Санлай къачурла, гатфарин тумар 234 агъзур гектардикай ибарат мулкарал цун пландик кутунва.

Къейд ийин хьи, Къарабудахкент ва СтIал Сулейманан районра тумар цун саки акьалтIарнава.

ЦицIерихъ галаз женг тухуниз талукь кардикай рахадайла, министрдин сад лагьай заместителди Россельхозцентрадин региональный филиалдин делилар гъайи­вал, акьван гзаф тушир мулкара мароккодин цицIерин шарагар пайда хьун Ногъай районда ва гьайванар куьчардай зонайра авай кьилдин майишатрин чилерал виле акьазва. Хабар гузвайвал, республикада цицIери кьунвай чилер «химиядин такьатралди гьялунин» серенжемар кьиле тухун патал пудратчияр тайинарнава. Амма, Шарип Шарипова къейдзавайвал, гьашаратар гзаф чукIунин вилик пад кьунин макьсаддалди абурун мукар фад тергун лазим я.

1,7 сеферда

Дагъустандин балугъчийри 2025-йисан январь-март варцара 428 тонн форель гьасилнава. Идакай «Дагъустан» РИА-ди хабар гузва.

Кьилди къачуртIа, чешмеди, Дагъус­тандин балугърин майшатдин Комитетдал асаслу яз, раижзавайвал, 2024-йисуз республикада 656 тонн форель гьасилнай.

Экспертрин ­гьисабралди

Дагъустанвийри недай суьрсетар гьи­кьван ишлемишзаватIа, экспертри гьисабар кьунва. И кардиз талукь делилар Дагестанстатди ва РД-дин хуьруьн майишатдин ва недай суьрсетдин министерст­води раижнава, хабар гузва «Дагъус­тан» РИА-ди.

Фар ва тIунутIар

Чешмеди раижзавайвал къейдерай­ малум жезвайвал, фанни тIунутIрин суьр­сетар ишлемишунал гьалтайла, 2023-йисан делилрал асаслу яз, юкьван статистикадин гьисабдалди дагъус­танвидал гьар йисуз 120 килограмм фан продуктар ацалтзава. Къейдзавайвал, им Россиядин юкьван гьисабдин рекъемдилай 8 килограммдин гзаф я. Идалайни алава яз, раижзавайвал, винидихъ вичикай ихтилат физвай суьрсет ишлемишунал гьалтайла, Дагъустан амай регионрин арада 24-чкадал ала.

Як

Хабар гузвайвал, 2023-йисуз Дагъус­танда як ва якIун продуктар гьар са агьалидал 50 килограмм ацалтнава. Раижзавайвал, гзаф регионрив гекъигайла, рес­публикада и рекъем агъузди я.

НекIедин ­суьрсет

Къейдзавайвал, 2023-йисуз юкьван­ гьисабдалди агьалиди ишлемишзавай не­кIедин ва адан продуктрин кьадар Да­гъустанда 286 килограммдикай ибарат хьанва. Регионрин арада им 12-чка, Россиядин юкьван гьисабдин дережадилай 39 килограммдин гзаф я. 2011-йисалай инихъ Дагъустанда инал вичикай ихтилат физвай суьрсет ишлемишунин кьадар 75 килограммдин артух хьанва…

Майваяр ва куьлуь емишар

Чешмеди раижзавайвал, майваяр ва куьлуь майваяр ишлемишунал гьалтайла, 2023-йисуз республика Россияда 4-чкадал экъечIнава — юкьван гьисабдалди са агьалидал 83 килограмм и жуьредин суьрсет ацалтуналди. 2011-йисалай инихъ и рекъем 13 килограммдин гзаф хьанва.

Гьа са вахтунда чешмеди кхьизвайвал, РФ-да емишар ва куьлуь емишар иш­­лемишунал гьалтайла, кIвенкIвечи чка­яр­ КБР-дини Краснодардин крайди кьазва: гьар са агьалидал, талукь тирвал, 126 килограмм ва 102 килограмм ацалтзава.

Яшайишдиз

2024-йисуз Дагъустандин бюджетдин 60 процентдилай гзаф харжияр яшайиш­дин сиясат патал рекье тунва. РД-дин финанс­рин министр Ш. Дабишева къейд авурвал, харжийрин умуми кьадардикай и макьсадар патал 136 миллиард манат ракъурнава­. Идакай «Дагъустан» РИА-ди хабар гузва.

Ш. Дабишева раижзавай къейдерай­ гьакIни малум жезвайвал, алатай йисуз­ государстводин идарайрин работник­рин мажибар хкажун патал 7,2 миллиард манат рекье тунва, адакай 4,4 мил­лиард манат (61 процент) федеральный бюджетдай ганва.

Гьазурайди — Муса  Агьмедов