Хъсан кам яз гьисабзава
Россиядин Президент Владимир Путина Украинадихъ галаз ачух рахунар кьиле тухунин жигьетдай авунвай теклиф чеб агъдабанар хьиз тухузвай Великобританиядин, Франциядин, Польшадин ва Германиядин регьберриз хъсан жаваб я. Ихьтин фикир Брюсселда авай америкави тарихчи, ЕС-дихъни США-дихъ галаз Россиядин алакъайрин рекьяй пешекар Г. Доктороуди лагьанва. Адан гафар «РИА Новости» чешмеда чапнава.
ТIварар кьунвай уьлквейрин регьберри, виликамаз шартIар малумар тавуна, 30 йикъан муддатда ислягьвал хуьн малумарна ва, эгер чпин теклифдал амал тавуртIа, еке санкцияр илитIда лугьуз, гьелягьар кьуна.
Пешекарди къейднавайвал, 30 юкъуз ягъунар акъвазарунин жигьетдай авур истемишунриз, мадни еке санкцийралди къурхуяр гуниз В. Путина гайи жавабди ам гьейранарнава.
«Россияди вичин теклиф малумарун — Зеленскийдин дестедихъ галаз 15-майдиз Стамбулда ачух рахунар кьиле тухун, гьа жергедай яз ягъунар акъвазаруниз талукь месэла веревирд авун — им агалкьунрин кам я», — лагьанва америкави тарихчиди.
Доктороудин гафаралди, и тегьерда Европадинни Америкадин регьберар рахунрин гьерекатривай къерех жезва. «Им лап хъсан кар я! Эгер Украинадин вилик-кьилик квайбуру Россиядин бейтерефвилин теклиф кьабулайтIа, гьакъикъатдани, къалмакъал ислягьвилелди гьялунин, меслятдал атунин кар мукьвал жеда», — алава хъувуна ада.
Мулкарин месэла
Лацу кIвалин регьбердин махсус илчи С. Уиткоффа «Breitbart» чешмедиз гайи интервьюда къейднавайвал, Москвадинни Киевдин арада кьиле фин мумкин тир рахунрин асул темайрик мулкарин месэла, Запорожьедин АЭС-дин дережа, Украинади Днепр ишлемишун жеда.
Д. Трампан векилдин гафаралди, гьуьжетра иллаки ЗАЭС-дин месэла важиблу я. «Путинан разивал авачиз, меслятдин икьрар кьиле фидач», — къейдна Уиткоффа.
Ада алава хъувурвал, Украинада гьалар пайгардик кухтунин месэла неинки Москвадихъни Киевдихъ, гьакI милли хатасузвилин рекьяй Британиядин, Франциядин, Германиядин ва Италиядин меслятчийрихъ галазни веревирднава. Махсус илчиди тестикьарзавайвал, Америкадин регьберди кьве терефдин арада ачух рахунар кьиле фин чарасуз тирди къейднава.
Гитлерав гекъигна
Еврокомиссиядин кьил Урсула фон дер Ляйен ва Евросоюздин маса регьберар, Украинадикай ва Россиядиз акси экъечIуникай рахадайла, гуя абур Адольф Гитлеран бункерда ава. Ихьтин гекъигун Чикагодин профессор Д. Миршаймеранди я. Идакай «РИА Новости» чешмеди хабар гузва.
«Ада (Еврокомиссиядин кьили), тестикьарунин са делилни гъун тавуна, Украинади дурум гуда лугьузва. Ада чпихъ са метлебни авачир гьакIан буш гафар лугьузва. На лугьуди, и ксар 1945-йисан апрелдиз Гитлеран бункерда авайбур я. Женгерин майданра авай къуватар, барабарвилер, кьве терефда авай аскеррин кьадарар чир хьун герек я. Ихьтин са жавабни чаз аквазвач», — къейднава профессорди.
Аслу тушир уьлкве
Абхазиядин президент Бадра Гунбади «РИА Новости» чешмедиз гайи интервьюда къейднавайвал, Гуржистандин кьиле авайбур Абхазиядин аслу туширвилиз муьтIуьгъ хьун герек я. «Гуржистандин вилик-кьилик квай сиясатчийри гьакъикъи гьалар гьисаба кьазвач. Абхазия аслу тушир государство я», — лагьанва республикадин президентди.
Адан гафаралди, Тбилисидихъ галаз анжах Абхазиядин аслу туширвал, кьилдинвал хиве кьурдалай кьулухъ рахунар кьиле тухуз ва къалмакъал тавунин гьакъиндай икьрардал къулар чIугваз жеда.
«Чна вири къуншийрихъ галаз ислягьвилелди яшамиш хьунин месэладиз кьилин фикир гузва. Чаз Гуржистандихъ галаз къуншивилин къени алакъаяр хьана кIанзава…», — гъавурда туна Гунбади.
Къейд ийин, 1992-1993-йисара хьайи военный къалмакъалдилай кьулухъ Абхазияди Гуржистандилай аслу туширвал малумарнай. 2008-йисуз лагьайтIа, Россияди Абхазиядин аслу туширвал гьисаба кьуна. А чIавалай инихъ Тбилисиди а регион «дяведалди къакъуднавай мулкар» яз гьисабзава.
Гьазурайди — К. Ферзалиев
