Икрам Алискеров: «Зун жуван хъсан версиядиз элкъвез, бягьс сифтегьан раундда акьалтIариз алахъда».
И келимаяр чи машгьур спортсмен, вичин ери-бине Кьасумхуьрелай тир Икрам Алискерова Америкадин Канзас-Сити шегьерда ММА-дай UFC-дин нубатдин бягьс башламиш жедалди са шумуд югъ амаз лагьанвай. Ада вичин гаф кьилиз акъудна… Икрам Алискерова Бразилиядай тир Андре Муниз 1-раундда ярхарна, технический нокаутдалди гъалибвал къазанмишна.
РикIел хкин: И. Алискерова женгинин самбодай 2012-йисуз дуьньядин ва Европадин чемпионвилин тIвар, 2013 ва 2014-йисара Россиядин Кубок, 2014-йисуз дуьньядин Суперкубок къазанмишна. 2022-йисан сентябрдиз ада Dana White’S Contender сериядин турнирда Бразилиядай тир М. Сузадихъ галаз бягьсина гъалибвал къазанмишуналди, UFC-диз — какахьай единоборствойрай бягьсер тухунал машгъул жезвай спортдин виридалайни чIехи ва кесерлу тешкилатдиз (ам США-дин Лас-Вегасда кардик ква) кам къачунай. Тамам 2 йис идалай вилик, 2023-йисан 6-майдиз, Нью-Джерси штатда (США) UFC-дин 288-турнирда сифте сефер яз иштиракай чи ватанэгьлиди америкави Фил Хоус сифте раундда нокаутдиз ракъуруналди, инанмишвилелди гъалибвал къазанмишна. Гьа и йисан октябрдиз Абу-Дабида кьиле фейи UFC-дин 294-турнирда Варлей Алвис нокаутдиз ракъурна. Икрам Алискеров UFC-дихъ галаз икьрар кутIуннавай чи миллетдин векилрикай сад лагьай спортсмен я. Кьасумхуьрел кардик квай дзюдодинни самбодин ДЮСШ-да сифтегьан вердишвилер къачур Икрам Алискерован агалкьунрик адан тренерар стхаяр тир Къурбановрин лайихлу пайни ква. Гила лагьайтIа, чи ватанэгьлиди пешекарвилин чIехи спортда вири санлай 16 гъалибвал къазанмишнава.
Рагнеда Рамалданова
