Ихьтин тIварцIиз мукьвара Росгвардия­дин Дагъустандин «Горец» ОМОН-дин са шумуд къуллугъчи лайихлу хьана. Да­гъустандин иви гудай центрадин ­кьилин духтур Хадижат Танкаева ва Н.М. Къу­ра­еван тIварунихъ галай ДРКБ-дин (Рес­пуб­ликадин аялрин клинический больница) иви хъиягъунин (переливание) от­деленидин заведующий Маржанат Гьуь­сейнова, омоновчийрив шагьадатнамаяр, ху­рудал алкIурдай лишанар­ ва грамотаяр вахкуз, отряддиз атана­. Къенин­ юкъуз­ Росгвардиядин Да­гъус­тан Респуб­ликада авай Управленидин къуллугъчийрикай 60-далай виниз ксар Россиядин гьуьрметлу донорвилин тIвар­цIиз лайихлу хьанва. Абурун арада чи ватан­эгьлийрин кьадарни тIимил туш.

Омоновчийри са йисуз 40-далай виниз сеферра иви гайиди, ихьтинбуруз «Россиядин гьуьрметлу донор» лагьай тIвар гузвайди къейдна мугьманри — медицинадин идарайрин векилри.

— Куьне неинки Ватан хуьзва, гьакI инсанрин уьмуьрарни къутармишзава. Куьне гузвай куьмекдин нетижада агъзурдав агакьна азарлуяр, гьа гьисабдай яз аяларни, сагъариз алакьна. Куьне гузвай куьмекдай, четин гьалда гьатайбурун тIалдикай хабар кьунай, чара ксарихъ рикI кунай куьн сагърай! — алхишна Х. Танкаевади.

— ОМОН-дин къуллугъчийри, иви гунин серенжемра иштиракиз, икI гъвечIи азарлуйрин уьмуьр къутармишиз хейлин йисар я. Ихьтин мергьяматлувили чаз екез куьмекзава. Куьн сагърай! Масадбурун уьмуьр къутармишуник куьнени лайихлу пай кутазва, — къейдна Маржанат Гьуьсейновади.

ОМОН-дин командир, полициядин полковник Рамазан Алиханова мугьманриз сагърай лагьана, отряддин къуллугъчияр, лазим атайла, инлай кьулухъни кIеве гьатайбуруз куьмек гуз гьазур тирди малумарна.

Чи мухбир