Алай девирда инсанрин арада гьуьрмет-хатур тIимил хьанвайди аквазва. Гьелбетда, им халкьдихъ рикI кудай, кесибвиле авай инсанрин дуланажагъдикай хабар кьадай, лугьудайвал, зурба рикIер авай инсанар авач лагьай чIал туш. Къуй ахьтин ксарин девлетар Аллагьди мадни артухаррай! Къе заз ихьтин ксарикай садакай — Кичибегов Мегьтихан Рагьединовичакай — суьгьбетиз, адаз сагърай лугьуз кIанзава.
М. Кичибегов СтIал Сулейманан райондин ДаркIуш-Къазмайрал дидедиз хьана. Юкьван школа хъсан къиметралди акьалтIарай жегьилди Дагъустандин хуьруьн майишатдин университетдин юристар гьазурдай факультетдиз гьахьун кьетIна. Вуз акьалтIарай ам Махачкъалада «Хъсан ниятар авай рикI» («Благое сердце») мергьяматлувилин фондунин бине эцигайбурукай сад я. ИкI, 2020-йисалай гатIунна, и кьегьал хци уьмуьрдин четин шартIара яшамиш жезвай хизанриз, аялрин бахчайриз, реабилитацийрин центрайриз, гзаф аялар авай хизанриз, сагъламвал зайиф тир аялриз, «Глория Джинс» фирмадин шейэр гуналди, куьмекзава. КIеве авайдаз куьмек гунин, чарадан тIалдикай хабар кьунин тербия адав вичин диде-бубадилай агакьна.
Чир хьайивал, алай йисан январдиз М. Кичибегов Кьасумхуьруьн, Ярагъ-Къазмайрин, Дербент шегьердин мектебриз ва аялрин бахчайриз мугьман хьана, анра игьтияж авай хизанрай тир аялриз еке куьмекар гана. Февралдиз Мегьтихан Рагьединович Мегьарамдхуьруьн 1-нумрадин юкьван мектебдиз мугьман хьана. Иниз ам вичин вах Алиметова Радмиладин теклифдалди атанвай. Чи мектебдани ада фондунин патай гзафбуруз, гьам сифтегьан классра, гьамни чIехи классра кIелзавайбуруз хъуьтIуьн парталар, кIвачин къапар, гатуз алукIдай перемар багъишна. Мектебдин кьиле авайбурун, аялрин диде-бубайрин патай ада еке гьуьрмет къазанмишна. Абуру вирида Мегьтиханаз сагърай лугьузва. Къуй Аллагь рикIел алай ксарин, мергьяматлу кьегьал рухвайрин кьадар мадни артух хьурай!
Марият Кьасумова,
Мегьарамдхуьруьн 1-нумрадин юкьван школадин сифтегьан классрин завуч
