9-апрелдиз Махачкъалада Росгвардиядин Кеферпатан Кавказдин округдин кьушунрин тади къуллугъдин кьилдин бригада (ОБрОН, Махачкъаладин соединение) арадал атана 29 йис тамам хьуниз талукьарнавай шадвилин мярекатар кьиле фена. Ана Махачкъаладин соединенидин командир, генерал-майор Дмитрий Чистякова, бригадада къуллугъзавайбуру — уьлкведин хатасузвал таъминарунин къуллугъда акъвазнавай ксари ва ветеранри иштиракна.
Мярекат башламишдалди вилик кIватI хьанвайбуру, къуллугъдин везифаяр кьилиз акъуддайла, телеф хьайибуруз Игитрин багъда (аллея) хкажнавай мемориалдал цуьквер эцигна, са декьикьада кисна акъвазуналди, абурун экуь къаматар рикIел хкана.
Мярекат ачухай генерал-майор Дмитрий Чистякова майдандал кIватI хьанвайбуруз лишанлу югъ тебрикна ва алатнавай йисара бригадада къуллугъзавайбуру, халис пешекарвал ва Ватандиз вафалувал къалуруналди, чпин хиве тунвай везифаяр намуслудаказ кьилиз акъудзавайди къейдна.
— Гьакъисагъ зегьметдин нетижада, вири четинвилериз дурум гуналди, къенин юкъуз бригададихъ женгинин баркаллу тарих хьанва. Куьне, гзаф вахтара чанарилайни гъил къачуна, пешекарвилин виниз тир ерияр къалуруналди, къуллугъдин рекьяй вилик эцигнавай женгинин везифаяр кьилиз акъудзава, уьлкведин итижар хуьзва. Къенин юкъуз бригададин къуллугъчийри Украинада кьиле тухузвай дяведин махсус серенжемда иштиракзава, общественный хатасузвал таъминарунин ва къайдаяр хуьнин везифаяр кьилиз акъудзава, гьакIни терроризмдиз акси серенжемар кьилиз акъудуникни лайихлу пай кутазва. Вилик эцигнавай вири везифаяр, месэлаяр, командирди хьиз ачухдаказ хиве кьан, куьне гьар сада агалкьунралди кьилиз акъудзава. Куьне, къуллугъ тамамарзавай тегьердилай зун рази я. Куьне, Ватандиз хьиз, къуллугъдин рекьяй куь юлдашрин адетризни вафалувал хуьзва. Гайи гаф гьамиша кьилиз акъудзава. Бригада арадал атай къенин югъ за квез виридаз тебрикзава. Къуй квехъ гьар садахъ мягькем сагъламвал, хизанра хушбахтлувал, къуллугъда мадни еке агалкьунар хьурай! — алхишна Дмитрий Чистякова.
Лишанлу югъ ветеранрихъ галаз кIвалах тухунин рекьяй командирдин куьмекчи, отставкада авай полковник Тажудин Жабраиловани тебрикна. Бригадада чпихъ виниз тир пешекарвал авай, кьилиндини, чпин пешедиз вафалу ва жуьрэтлу ксари къуллугъзавайди къейд авунихъ галаз сад хьиз, ада гележегдани абуру кьинез вафалувал къалурдайдахъ, Ватандин вилик пак буржи намуслудаказ кьилиз акъуддайдахъ кIевелай инанмишвал къалурна.
— Заз вири ветеранрин тIварунихъай квехъ чандин сагъвал, куь кьилелни экуь михьи цав хьунин чими келимаяр агакьариз кIанзава. Къуй куь хизанра шадвал ва берекат хьурай! Къуллугъдин везифаяр намуслудаказ кьилиз акъудунай, гьакIни женгинин дуствилин баркаллу адетар хуьнай куьн сагърай. Алай вахтунда СВО-да авайбурун тIварарихъни тебрикдин чими келимаяр лугьуз кIанзава. КIвалахдин везифаяр кьилиз акъуддайла, телеф хьайи чи юлдашар, абурун хизанар чна садрани рикIелай алуддач. Абурун экуь къаматар чи рикIера гьамиша амукьда, — лагьана Т. Жабраилова.
Гуьгъуьнлай кIвалахда тафаватлу хьайибурув шабагьар ва къиметлу пишкешар вахкана. Росгвардиядин Махачкъаладин соединенидин военный оркестрди Дагъустан Республикадин лайихлу артист Ильяс Бектемирован регьбервилик кваз концерт гана.
Рагнеда Рамалданова
