СтIал Сулейманан райондин Алкьвадрин хуьруьн мектебдин майдандал чIехи классра кIелзавай аялрин арада урус чIалай районрин уртах 4-олимпиада кьиле фена.
14-апрелдиз кьиле фейи и олимпиада, хабар гузвайвал, райондин администрацияди мергьяматлувилин «Иман» фондунин куьмекдалди кьиле тухузвай ва аялрин арада бажарагълубур вилик акъудунихъ, абурун итижар яратмишдай ва ахтармишдай кIвалахдал желб авунихъ элкъуьрнавай образованидин хилен пуд проектдикай сад я.
Олимпиададин акъажунра иштиракун патал иниз СтIал Сулейманан, Докъузпара, Кьурагь, Мегьарамдхуьруьн ва Хив районрин мектебрин 10-11-классра кIелзавай 64 аял атанвай. Жюридик ва пешекаррин комиссиядик республикадин бажарагълу аялар патал гзаф хилерин лицей-интернатдин урус чIаланни литературадин муаллим Гь. Гьажимурадова, бажарагълу аялар винел акъудунин, абуруз куьмек гунин «Альтаир» центрадин ва РД-дин лайихлу муаллим И. Билалова, Махачкъаладин 22-нумрадин лицейдин урус чIалан ва литературадин муаллим, РФ-дин образованидин гьуьрметлу работник Р. Исабегова квай.
Олимпиададин иштиракчийриз пешекаррин комиссияди гьазурнавай тапшуругъар гана. Абур 1 сятинин вахтунда тамамарун лазим тир.
Акъажунрин нетижаяр пешекаррин дестедин председатель Гьабибат Гьажимурадовади кьуна. ИкI, ада малумарайвал, гъалибвилин 1-чкаяр СтIал Сулейманан райондин Кьулан СтIалрин мектебда кIелзавай С. Мусаева (11-класс) ва Ахцегьрин мектебдай тир С. Мустафаевади (10-класс) кьуна.
Пишкешриз лайихлу хьайибурун арада ава: Ф.Эмирчубанова (Докъузпара райондин ЦIийи Къаракуьре) ва А. Мерданова (Хивдин СОШ); 11-классра кIелзавайбурун арада — М. Сейдалиева (Агъа СтIалрин мектеб) ва М. Рагьимова (Мегьарамдхуьруьн райондин Тагьирхуьруьн-Къазмайрин мектеб).
Олимпиададин гъалибчийриз ва хъсан чкаяр кьурбуруз мергьяматлувилин «Иман» фондунин патай дипломар ва пулунин пишкешар гана.
СтIал Сулейманан райондин кьил Саид Темирханова агалкьунар хьанвай аялриз тебрикдин гафар лагьана ва образованидин рекье тешкилзавай ихьтин проектри абуруз ЕГЭ нетижалудаказ вахкуз, гележегда хкядай пешедин рекьяй еке агалкьунрив агакьариз куьмек гудайдахъ инанмишвална. ГьакIни ада образованидин хиле гъиле кьазвай къени крарин, теклифрин, проектрин тереф хуьнай мергьяматлувилин «Иман» фондуниз, адан учредитель Фируза Керимовадиз, Ханбалаеврин хизандиз чухсагъул лагьана.
Жасмина Саидова
