Кьурагьрин 1-нумрадин мектебдин майдандал  ЧIехи Гъалибвилин 80 йис тамам хьунихъ галаз алакъалу яз кьиле тухузвай ва чирвилерин дережа ахтармишуниз талукь тир республикадин «Гъалибвилин ирсдарар» къугъунин хкядай кьвед лагьай пай кьиле фена.

И къугъун Ватандин ЧIехи дяведин вакъиайрикай жегьилрихъ авай чирвилер деринаруниз талукьарнава. Ада Кьурагьрин 1 ва 2-нумрайрин, Ашарин ва Хпежрин хуьрерин мектебра кIелзавай аялрикай ибарат командайри иштиракна.

Кьвед лагьай паюник 30 суал кутунвай. Дяведин тарихдин важиблу вакъиайриз талукь тир абуру аялрин командайрин  гьазурлухвилин дережа ахтармишдай мумкинвал гана.

Къугъунин эхиримжи, яни финалдин пай 18-апрелдиз кьиле тухуда. Адан гъалибчийри, хабар гузвайвал, Махачкъалада хьун лазим тир региондин паюна иштиракда.

Амина Муслимова