Россиядин Игит Мегьамедали Мегьамеджанован тIварунихъ галай Ахцегь райондин Луткунрин хуьруьн юкьван мектебдин майдандал РД-дин образованидин ва илимдин министерстводин ва мергьяматлувилин крарал машгъул Чергес Мамешеван куьмекдалди райондин 7-11-классра кIелзавай аялрин арада «Математикадай Юждагдин олимпиада» сад лагьай сеферда кьиле тухвана.
12-апрелдиз тешкилай и акъажунра Кьиблепатан Дагъустандин 9 муниципалитетдай — Агъул Ахцегь, Дербент, Докъузпара, Кьурагь, Мегьарамдхуьруьн, Рутул ва СтIал Сулейманан районрай тир аялри иштиракна. РД-дин образованидин ва илимдин министерстводи къейдзавайвал, Луткунрин мектебдин директорди олимпиада вини дережада аваз кьиле тухун таъминарна. Олимпиададин гьар са хиляй 1 гъалибчи ва пишкешдиз лайихлу хьайи 3 аял хкяна. Гъалибчийриз кубокар, дипломар ва гьардаз 15 агъзур манат пул гана, пишкешрин чкаяр кьурбуруз – медалар, дипломар ва 5 агъзур манат.
Гъалиб хьайи аялриз пишкешар гунин шад мярекатда иштиракай Ахцегь райондин кьил Абдул-Керим Палчаева къейд авурвал, олимпиададин нетижаяр кьадайла, иллаки еке фикир гьахълувилиз ва адалатлудаказ эгечIуниз гана.
«Хъсандаказ кIелзавай ва гьам чпин, гьамни Ватандин кьисметдив кьил-кьилеллаз эгечIзавай чи жегьилар акурла, зи рикI иллаки шад жезва. Вини дережадин чирвилер авай хъсан пешекарар халкьдин майишатдин вири хилера лазим я. Гьаниз килигна, заз къейд ийиз кIанзава – чун дуьз рекье ава!» — лагьана ада тебрикдин келимайрилай гуьгъуьниз.
***
И йикъара Абдул-Керим Палчаева гьакIни районрин уртах ва республикадин олимпиадайра гъалиб хьайи аялриз ва абур гьазурай муаллимриз чухсагъулдин чарар ва пулдин шабагьар гунин мярекат кьиле тухвана.
«Зун тикрариз галатдач — чи уьмуьрда вири крар сад-садахъ галаз алакъалу я. Акьалтзавай несил лайихлудаказ тербияламишун патал чна исятда ийизвай вири кIвалахар уьлкведин гележег бахтлуди хьун патал кутазвай пай я. Къе — олимпиадайрин гъалибчияр, пака — савадлу духтурар, инженерар, эцигунардайбур ва, ватандал рикI алаз, дидедин чIал, бубайрин адетар, халкьдин девлетлу ирс хуьз, къведай несилар тербияламишдай муаллимар. И месэлайрив рикI гвачиз эгечIдай ксар хьун лазим туш!», — лагьана райондин кьили.
Амина Муслимова
