Мегьарамдхуьруьн райондин Советский хуьруьн мектебда кIелзавай Аизар Жагьангировна Асварова Вирироссиядин «Чан алай классика» конкурсдин республикада кьиле фейи паюнин шабагьдин сагьиб хьана. Райондин информациядин къуллугъди хабар гузвайвал, Аизара конкурсдал Джон Гринан «Гъетер тахсирлу я» эсердай са чIук гуьзелдаказ, таъсирдайвал кIелна.
Къейд ийин, «Чан алай классика» конкурсдин регионрин дережадин пай и мукьвара Дагъустандин государстводин халкьдин майишатдин университетдин (ДГУНХ) майдандал кьиле фена. Бажарагълу аялриз рехъ гунин «Альтаир» центради иниз Дагъустан Республикадин гьар жуьре мектебрай тир ва литературадин эсерар виридалайни хъсандаказ кIелзавай 60 аял кIватIна.
Региондин дережадиз акъатун патал абур сифтедай классдин, ахпа мектебдин ва муниципальный конкурсра гъалиб хьун, тестер вахкун, абурун рецензийриз къиметар гун ва, эхирни, республикадин паюнин заочный турда гъалиб хьун лазим тир. Къейдзавайвал, эхиримжи паюниз, дугъриданни, анжах виридалайни бажарагълу аялар акъатна. Кьве хилекай ибарат конкурс башламишдалди вилик жюридик квай пешекарри аялриз агалкьунар хьун алхишна. Абурун арада, гьа жергедай яз, шаир Миясат Муслимова, композитор Ажий Абиева, «Альтаир» центрадин директор Аймисей Дибирова авай.
Шиирар, эсеррай чIукар кIелзавай аялар иллаки гьевеслу тир — абуруз ина кIватI хьанвай ва чеб гурлудаказ кьабулзавай ксарин рикIерин ачухвал, тереф хуьн аквазвай. Амма, РД-дин образованидин ва илимдин министерстводи хабар гузвайвал, конкурсдин иштиракчийриз жюриди къиметар гудайла, эмоцийрал ваъ, гьахълувилел ва адалатлувилел амал авуна, гьикI лагьайтIа, гъалибчияр патал гьазурнавай пишкешар вижевайбур я — Артек лагердиз фин ва Яру майдандал экъечIна рахун.
Гьа икI, баллар гьисабайдалай кьулухъ малум хьана: 1-чка — Хасавюрт шегьердин гимназияда кIелзавай Абдурагьман Лабазанова, 2-чка — Къизилюрт райондин Зубутли-Миатли хуьруьн гимназиядин ученица Хадижат Хайбулаевади, 3-чка Дербент шегьердин 18-гимназияда кIелзавай Карина Шихалиевади кьуна.
Конкурсдин шабагьриз, дипломриз ва пишкешриз жюриди кьетIендаказ къейд авур 21 кас лайихлу хьана, абурун арада А.Асваровани ава.
Жасмина Саидова
