12-апрелдиз Дагъустандин Кьил Сергей Меликова Россиядин радиациядин, химиядин ва биологиядин рекьяй хаталувал авай яракьрикай хуьдай кьушунрин (РХБЗ) дишегьлийрин советдин председатель Светлана Кирилловадихъ галаз гуьруьш кьиле тухвана. Идакай «Лезги газетдиз» РД-дин Кьилин пресс-къуллугъди хабар гана.
Гуьруьшда Россиядин Игит Андрей Соловьева, ТАСС-дин директордин меслятчи Владимир Хмелева, маршал Коневан хтул Елена Коневади, «Русское наследие» фондунин векилри ва масабуру иштиракна.
Мярекатдин сергьятра аваз, С. Кирилловади Дагъустанди Украинада кьиле физвай махсус серенжемда иштиракзавай аскерриз, абурун хизанриз гузвай куьмекдин гьакъиндай вичин фикирар лагьана ва и жигьетдай кьиле тухузвай кIвалахдиз еке къимет гана. «Чаз чи аскерри Дагъустанди ва кьилди куьне СВО-дин иштиракчийрин хизанриз, телеф хьайи аскеррин мукьвабуруз ийизвай куьмекдикай ихтилатна. Гьавиляй чна и республикадиз мугьман жедай ва Дагъустандин вири халкьдиз сагърай лугьудай къарар кьабулна. Куь аскерри, Ватандин ЧIехи дяведин йисара абурун чIехи бубайри хьиз, алай вахтунда жуьреба-жуьре миллетрикай ибарат Россиядин армиядин жергейра аваз хайи чил хуьзва. Завай Украинада кьиле физвай махсус серенжемда рухваяр, уьмуьрдин юлдашар телеф хьайи дидеяр, дишегьлияр къужахламиш тавуна акъвазиз хьанач. Зун иниз атунни гьавиляй авунва», — лагьана Светлана Кирилловади.
Сергей Меликова вичин нубатда С. Кирилловадиз Дагъустандин халкьдин тIварцIихъ хуш келимаяр лугьунай сагърай лагьана ва адан уьмуьрдин юлдаш — РХБЗ-дин кьушунрин начальник Игорь Кириллов телеф хьунихъ галаз алакъалу яз, адаз башсагълугъвал гана. Гуьгъуьнлай республикадин Кьили Дагъустанди СВО-да къуллугъзавай аскерриз, абурун хизанриз куьмекар гун патал чкадал кьабулнавай серенжемрикай суьгьбет авуна.
Гуьруьшдикай гегьеншдиз РД-дин Кьилин сайтдай кIелиз жеда.
Чи мухбир
