Дагъустандин Кьилин Ситуационный центрада РД-дин Гьукуматдин Председателдин заместитель Нариман Абдулмуталибован регьбервилик кваз республикадин мулкара авай тамари цIай кьуниз рехъ тагун патал кьабулзавай серенжемриз талукьарнавай совещание кьиле фена.
Мярекатдин эвел кьиляй Н. Абдулмуталибова мукьвара республикадин са шумуд муниципалитетда тамари кьур цIаяр хкадарун патал кьиле тухвай кIвалахдикай ихтилатна. Адан гафаралди, тамари цIай кьунин гзаф дуьшуьшар инсандихъ галаз алакъалу я, гьавиляй чкадин агьалийрин арада гъавурда тунин кIвалах кьиле тухунихъ еке метлеб ава.
Россиядин МЧС-дин РД-да авай Кьилин Управленидин начальник Муслим Девришбегова къейд авурвал, 30-мартдилай 10-апрелдалди республикадин 5 муниципалитетда тамари цIай кьур 9 дуьшуьш хьана. Ада гьакIни хабар гайивал, цIай кьунин хаталувал авай сезондин вахтунда гьар са хуьре чкадин агьалийрин арада гъавурдик кутадай кIвалах тухузвай 5 касдикай ибарат дестеяр арадал гъизва. КьетIен фикир абуру инсанри, хатасузвилин къайдайрал амал тавуна, кьуранвай векьер-кьалариз, зирзибилдиз цIай язавай дуьшуьшар винел акъудуниз гузва.
Къейд ийин хьи, 1-апрелдилай Дагъустанда тамари цIай кьунин еке хаталувал авайвиляй кьетIен гьаларин режим кардик кутунва. Адан сергьятра аваз, тамарин мулкара цIаяр авунал къадагъа эцигнава.
Гегьеншдиз РД-дин Гьукуматдин телеграм-каналдай кIелиз жеда.
Чи мухбир
