26-мартдиз, Сив хуьнин сува­рин вилик, Избербаш шегьер­да авай етим аялрин 7-нумрадин кIвале мергьяматлу­вилин серенжем кьиле­ фе­на­. Россия­дин журналист­рин союздин Дагъус­тандин отде­­­лениди ина кIвалахза­вай тер­биячийриз ва аял­риз­ ифтар­ тешкилнавай. Къейд ийин­ хьи, серенжем отделенидин­ ре­ви­зиядин комиссиядин пред­се­датель, «Лезги газетдин»­ вафалу амадагри­кай сад тир Мурад Мегьамедкери­мован куьмекдалди кьиле тухвана.

И юкъуз аялрин кIвале халис сувар тир. Сив хкуддай вахт мукьва жезвай арада ина жуьреба-жуьре тIуьнар, ширинлухар, мижеяр алай суфраяр ачухна. РФ-дин журналистрин союздин Дагъустандин отделенидин председатель Мегьамед Ибрагьимова мярекатдин иштиракчийриз мукьва жезвай Сив хуьнин сувар мубаракна, виридахъ чандин сагъвални еке агалкьунар хьун алхишна.

Ада гьакIни кьилел диде-буба аламачир аялар патал ихьтин шад ва геждалди рикIел аламукьдай сувар тешкилунин карда куьмекар гунай Мурад Мегьамедкеримован тIварцIихъ хуш келимаяр лагьана.

Ифтардилай гуьгъуьниз кIва­лин директор Вера Рамазановадини адан заместитель Зумруд Рашидовади атанвай мугьманар ина авай шартIарихъ галаз танишарна. Малум хьайивал, алай вахтунда кIвале 50 аял тербияламишзава. Абур, яшариз килигна, 5 дестедиз пайнава. Шад жедай кар ам я хьи, аялриз ина вири жуьредин къулайвилер тешкилнава. Кьилинди тербиячийри абур чпин хайи веледар хьиз кьабулнава.

Гуьруьшдин эхирдай Вера Рамазановади аялрин кIвалин коллективдин патай РФ-дин журналистрин союздин Дагъус­тандин отделенидин кьилевайбуруз чпиз мугьман хьунай, фикир гунай, аялрин рикIер шадарунай сагърай лагьана.

Чи мухбир