Эвер гузва

«Зи ГАЗ» сервисдихъ галаз алакъалу тир лутувилин цIийи къурулушдикай малум хьанва. Идакай сервисдин ЛКА-да (личный кабинет абонента) хабар гузва.

Раижзавайвал, чIуру къастар авайбуру гуя сервисдин патай я лугьуз, агьалийриз СМС ракъурзава, идалай гуьгъуьниз чеб газдин компаниядин пешекарар хьиз танишвал гузвай ксарилай зенгер къвезва. ЛКА-да хабар гузвайвал, лутуйри чпин фенд и къайдада кьиле тухузва:

— куьне СМС къачузва, гуя вич «Зи ГАЗ» сервисдилай тир;

— ахпа квез гуя «газдин компаниядин векилри» зенгзава;

— квевай СМС-дай квез атанвай код лугьун тIалабзава, гуя «икьрар кардик кутун патал», гьа ихьтин маса багьнаярни къалурзава.

И кардихъ галаз алакъалу яз, ЛКА-да раижзавайвал, абонентдин «жуван кабинетдай» делилар кардик кутунин кIвалах садрани и къайдада кьиле тухузвайди туш. Хабар гузвайвал, я газдин компания­дин пешекарри, я «жуван кабинетдин» раз­работчикри агьалийривай садрани­ СМС-дай атанвай кодар тIалабдайди туш.

Гьа са вахтунда раижзавай къейде­рай гъавурда акьазвайвал, агьалиди ра­къурай арзадин сергьятра аваз, адаз СМС ракъурдай тек са дуьшуьш авазва, гьамни, инал къейднавайвал, агьалиди вичи а кьилихъ галаз алакъа хуьнин къайдадин (обратная связь) куьмекдалди ракъурнавай арзадин сергьятра аваз. (Яни инал гъавурда акьазвайвал, агьалиди вичи а кьилихъ галаз алакъа хуьнин къайдадин куьмекдалди арза ракъурайла, ахпа адаз гьакъикъатдин СМС атун мумкин я. Амма гьа и чIавузни агьалийривай газдин компаниядин векилри кодар тIалабда лагьана кхьенвач малуматда. Мумкин я, а СМС-да арзадиз талукь тир жаваб аваз хьун).

Ихьтин зенгер гьакIни «Зи ГАЗ» сервисдин «жуван кабинет» ишлемиш тийизвайбурузни авун мумкин я. ЛКА-да агьалийривай мукъаятвал хуьн ва вичикай ихтилат физвай къурулушдикай гьар сада вичин мукьва-кьилияр, багърияр, иллаки яшлу инсанар хабардар авун тIалабзава.

ТуькIуьр хъийида

2025-йисуз Дагъустанда гзаф квартирайрикай ибарат саки 120 кIвал туькIуьр хъийида. Идакай, капитальнидаказ туь­кIуьр хъувунин фондунин регьбердин везифаяр тамамарзавайди тир Нажмудин Ханбалаеван гафарал асаслу яз, «Да­гъус­тан» РИА-ди хабар гузва.

Ада раижзавайвал, кьилди къачуртIа, региондин программадин сергьятра аваз, капитальнидаказ туькIуьр хъувунин кIвалах республикадин 118 МКД-да кьиле тухун пландик кутунва.

Нажмудин Ханбалаева къейдзавайвал, винидихъ чпикай ихтилат физвай макь­са­дар патал 835 млн манатди­лай гзаф пулдин такьатар чара авун пландик кутунва.

Гьа са вахтунда хабар гузвайвал, гзаф квартирайрикай ибарат кIвалер капитальнидаказ туькIуьр хъувунин кIвалахар региондин 12 муниципалитетда кьиле фида.

Кьве сеферда гзаф

Дагъустанда энергия ишлемишун ам гьасилунин кьадардилай саки кьве сеферда гзаф хьанва. Идакай, махсус чешмедал асаслу яз, «Дагъустандин экономика» телеграм-каналди хабар гузва.

Кьилди къачуртIа, чешмеди кхьизвайвал, Дагъустандин премьер-министр Абдулмуслим Абдулмуслимован гафаралди, республикада 2024-йисуз электроэнергия ишлемишунин кьадар 9,4 млрд кВт/ч-дикай ибарат хьанва.

Ада лугьузвайвал, гьа са вахтунда кардик квай электростанцийри 5 млрд кВт/ч-дилай са кIус гзаф кьадарда аваз энергия гьасилнава. Гьа икI,  республикада энергиядин гужлувал гудай такьатрин эксиквал хьунин рекъем саки кьве сефердин кьадардив агакьнава.

Раижзавай къейдерай гъавурда акьаз­вайвал, эксиквал гьар йисуз уьлкведин маса регионрин къурулушрай гъизвай энергиядалди эвез хъийизва.

Артух хьанва

Росстатдин делилралди,  Дагъустанда эцигунардайбуру гзаф квар­­ти­райрикай ибарат кIвалер ишле­ми­шиз­ вах­кунин кьадар 2025-йисан январь-фев­раль варцара 108,4 процентдин артух хьанва.

Алай йисан­ сифтегьан кьве вацра Да­гъустандин эцигунардайбуру кардик кутун патал вахканвай гзаф квартирайрикай ибарат кIва­лерин кьадар 134,6 агъзур­ кв. метр­диз барабар хьанва. Им, алатай йисан и муддатдив гекъигайла, винидихъ къейднавайвал, 108,4 процентдин ва я 70 агъзур кв. метрдин гзаф я.

Гьазурайди – Муса  Агьмедов