И мукьвара Дагъустандин премьер-министр Абдулмуслим Абдулмуслимова етим ва диде-бубадин къаюмвиликай хкатнавай аялар кIвалералди таъминаруниз талукьарнавай совещание кьиле тухвана. Идакай чаз региондин кабминдин пресс-къуллугъди хабар гана.
Совещанида РД-дин Гьукуматдин Председателдин сад лагьай заместитель Манвел Манжонца, Махачкъаладин мэр Юсуп Умавова, Дербентдин мэр Агьмед Къулиева ва масабуру иштиракна.
А. Абдулмуслимова етим ва диде-бубадин къаюмвиликай хкатнавай аялриз куьмек гун гьукумдин органрин эвелимжи везифа тирди, абур кIвалералди таъминарун патал гьар йисуз федеральный ва республикадин бюджетрай такьатар чара ийизвайди къейд авунихъ галаз сад хьиз, алатай йисуз и рекьериз 800 миллиондилай артух пул харж авурди рикIел хкана.
— КIвалералди таъминарун лазим тирбурун жергедик акатзавай аялриз алай йисуз кIвалер гун патал федеральный бюджетдай 190 миллион манат планламишнава, республикадин бюджетдайни — 653, 8 миллион манат, — раижна ада.
А. Абдулмуслимован гафарай мадни малум хьайивал, и такьатрикай са пай къалурнавай категория патал кIвалерин сертификар маса къачуниз рекье твада, муькуь пайни кIвалер маса къачун патал муниципалитетрин арада пайда. Гьа икI, 300-далай тIимил тушиз аялар цIи кIвалералди таъминарун пландик ква.
Етим ва диде-бубадин къаюмвиликай хкатнавай аялар кIвалералди таъминаруниз талукь кьве хилекай гегьеншдаказ Дагъустандин эцигунрин, архитектурадин ва ЖКХ-дин министрдин заместитель Салам Гьасайниева суьгьбетна.
— Сад лагьай хел 2024-йисуз конкурсдин бинедаллаз 108 кIвал (помещение) маса къачунвай муниципалитетрал такьатар агакьарун я. Кьвед лагьай хел сертификар гуникай ибарат я. Шаз лагьайтIа, чна 190 сертификат ганай. И жуьреда чна алай йисузни кIвалах давамарда, — алава хъувуна ада.
А. Абдулмуслимова администрацийрин кьиле авай ксариз тайинарнавай вахтара ва тамамдаказ и месэладал кIукI гъунин тапшуругъ гана.
Рагнеда Рамалданова
