Россиядин Яшайишдин фондунин Дагъустанда авай Отделенидин пресс-къуллугъди хабар гузвайвал, 1-апрелдилай яшайишдин пенсиядин кьадар 14,75 процентдин хкажнава. Иник чи региондай тир 120 агъзур агьали акатзава. Къейд авун лазим я хьи, яшайишдин пенсия инсан яшамиш хьун патал регионда тайинарнавай пулунин агъа кIанин кьадар артух хьунихъ галаз алакъалу яз хкажзава.

Малуматда мадни хабар гузвайвал, яшайишдин пенсиядихъ галаз сад хьиз пенсияр хкажнава:

 Ватандин ЧIехи дяведин иштиракчийрин;

 «Ленинграддин блокададин агьали», «Гьалкъада гьатнавай Севастополдин агьали», «Гьалкъада гьатнавай Сталинграддин агьали» лишанралди къейднавай ксарин;

 армиядин жергейриз эвер ганвай военный рекьяй къуллугъчийрин ва абурун хизанрай тир зегьмет чIугваз тежезвай ксарин;

 радиациядин таъсирдик акатайбурун ва абурун хизанрай тир зегьмет чIугваз тежезвай ксарин;

 космонавтрин  ва  летчикрин — ахтармишунардайбурун (испытатель);

 агьалийрин маса къатарин.

Апрелдин вацра артухарнавай кьадарда аваз пенсия адетдин тегьерда, яни агьалийриз ам гузвай йикъара агакьда.

РикIел хкин: алай йисалай пенсиядин кьадар гила пуд лагьай сеферда хкажнава. ИкI, 1-январдилай кIвалахзавай ва кIвалахдик квачир агьалийрин пенсия 7,3 процентдин артухарнавай. Иник республикадай тир 550 агъзур агьали акатна. Февралдиз гьа и кьадардин, яни 550 агъзур агьалидин, пенсия 7,3 процентдилай 9,5 процентдал агакьдайвал хкаж хъувуна.

Чна виликдайни хабар гайивал, эгер и ва маса пуларин гьакъиндай суалар пайда хьайитIа, абуруз жавабар СФР-дин Дагъустанда авай отделенидин алакъадин­ сад тир центрадиз телефондин 8-800-1-00000-1 нумрадиз­ зенгна, чириз жеда. Зенг авун пулсуз я.

Рагнеда Рамалданова