Чинеба рахазва

Сербиядин президент Александр Вучича блогер М. Науфалудиз гайи интервьюда къейднавайвал, дуьньядин чIехи уьлквейрин регьберри  Владимир Путинахъ галаз чинеба рахунар-веревирдер кьиле тухванва. Идакай «РИА Новости» чешмеди хабар гузва.

«Заз Путин такуна пуд йис я. Амма маса уьлквейрин регьберар адахъ галаз чинеба рахазва. Ихьтин кьве регьбер заз чида», — лагьана ада.

Вучича тестикьарайвал, 9-Майдиз В. Путинахъ галаз кьиле фидай гуьруьш эхиримжи 3,5 йисан муддатда сад лагьайди жеда. «Им чна вири рикIин сидкьидай ийизва лагьай чIал я. Чун гьахълу ва гафуниз вафалу я лагьай чIал я. Чна вуч лугьузватIа, гьам ийизва, масабуру лагьайтIа, гьамиша и кардал амалзавач», — къейдна Вучича.

Сербиядин президентди вич Москвадиз Гъалибви­лин 80 йисан суварик атун ва парадда иштиракун патал Сербиядин аскерар ракъурун 7-мартдиз Россиядин регьбердихъ галаз телефондай рахай вахтунда тестикьарнай.

Гьужумар артухарнава

Киевди Россиядин энергетикадин объектрал гьужумар давамарзава, амма украинвийри США-дин президент Д. Трампан командадиз и крарикай хабар аваз хьун фикирда кьазвач. «РИА Новости» чешмеди хабар гузвайвал, ихьтин фикир РФ-дин МИД-дин векил М. Захаровади малумарна.

Адан гафаралди, виликан президент Байденаз хьиз, гила Трампаз арадал къвезвай гьалар-шикилар къалуруналди, Киевда энергообъектрал гьужум давамаруник умуд кутазва. Захаровадин фикирдалди, и тегьерда Зеленскийди США-дин президентдиз гьуьр­метсузвал къалурзава.

Къейд ийин, идалай вилик РФ-дин оборонадин министерстводи Россиядин энергетикадин объект­рал Ук­раинадин кьушунри гьужумар артухарнавайдакай малумарнай.

Желеда гьатнава

Эхиримжи пуд йисуз гзафбур патал якъин хьайивал, гьам Россия, гьам Китай чара ийиз, хкудиз жедай уьлквейрикай туш: чеб чпихъ ва маса уьлквейрихъни галаз алакъада авай и чIехи уьлквейрин роль гьахьтинди я. Ихьтин фикир «РИА Новости» чешмеда Россиядин дипломат, сиясатчи А. Яковенкоди малумарна­.

Макъалада къейднава хьи, адан фикирдалди, Киевди вич тухузвай тегьер себеб яз, Трамп желеда гьатнава. Трампа теклифнавай вири месэлайрай Киев чинеба, кIаникай манийвал гуз алахъун — им сифте нубатда Европадин меркезар патал «хаталу къугъун» я. Вучиз лагьайтIа, Лацу кIвал, эгер вичин теклифар кьабул тавуртIа, кIеви серенжемар кьабулда лагьана гьелягьар кьуналди, къалмакъал къайдада тунин гьерекатривай къерех хьунни мумкин я.

Ядерный дяведиз гьазурзава

Европадин уьлквейри чпин ватандашар Россиядихъ галаз хьунухь мумкин тир ядерный дяведиз гьазурзава. Идакай «The Economist» чешмеди хабар гузва.

Швецияда сагъдиз амукьунин асул къайдайрикай­ малуматар кхьенвай 5 миллион листовка халкьдив агакьарнава. Идалайни гъейри, брошюрайра гьукум­дарри ватандашриз уьлкведал гьужум авур дуьшуьш­да ийидай гьерекатар виликамаз фикирдиз гъуниз­ эвер гузва. Чешмеди къейдзавайвал, листовкаяр халкьдин арада чукIурунин макьсад агьалийриз кичIерар гун ваъ, абур ахварай авудун я. Тестикьарзавайвал, ихьтин серенжемди четин гьалар арадал атай дуьшуьшда государстводин къурулушрал ацалтдай пар кьезилардай мумкинвал гуда.

Гренландиядин месэла

Чиликай хкуддай мядендин менфятлу затIарик умуд кутуналди, США-диз Гренландия америкавияр патал фикир желбдай жуьреда къачуз кIанзава. Идакай­ «WP» чешмеди хабар гузва.

«Гренландияда ийидай харжияр чиликай хкуддай менфятлу затIарай къачудай къазанжидин гьисабдай­ эвез хъийида лугьуз, Д. Трампан администрация США-­дин халкьар инанмишариз алахъзава», — кхьенва чешмеда.

Къейд ийин, США-дин регьберди остров уьлкведик кухтунин жигьетдай вичин къаст кьилиз акъатдайди тирди 30-мартдиз малумарнай.

Гьазурайди — К. Ферзалиев